USA-p illersornissamut ministeria Kalaallit Nunaata tiguarneqarnissaa pillugu aperineqarami: Suut tamaasa pilersaarusioreerpavut

Nunamik tiguaanissamut USA pilersaaruteqarnersoq politikkerit arlaleriarlutik aperipput, ministerillu tamanna arlaleriarluni itigartitsissutiginngilaa.

Allattoq Ritzau

juunip 13-at 2025 12:48

Nutserisoq Tabetha Kreutzmann

USA-p illersornissamut ministeria, Pete Hegseth, sisamanngornermi kongressimi ataatsimiititaliami Kalaallit Nunaat Panamalu tiguarniarlugit USA pilersaaruteqarnersoq arlaleriarluni aperineqarpoq.

Hegseth arlaleriarluni toqqaannartumik akinngilaq.

- Kalaallit Nunaat Panamalu tiguarumallugit pisariaqassappat sakkutuulersortariaqarnissarput illersornissamut ministereqarfiup politikkerivaa?, NBC News oqaloqatigiinnermit filmiliamik saqqummiussisoq naapertorlugu Adam Smith Demokraatineersoq aperivoq.

USA-p nunatsinnik aqutsilernissamik kissaataa

USA-p Kalaallit Nunaat pigissagaa isumaqarluni, Donald Trump 2024-mi decembarip 23-ani oqaaseqarpoq. Oqariartuut tamanna taassuminnga sulisuiniillu arlalerialugu uterneqarpoq.

Donald Trumpip ernera angajulleq, Donald Trump Jr. Nuummut januaarup arfineq-aappaani tikippoq, tamannalu nunarsuarmit nunarput ukkatarineqalerneranik kinguneqarpoq.

Præsidentinngortussap aningaasaqarneq sakkutuulersornerlu atorlugit Kalaallit Nunaat aqunniassanerlugu mattunnagu ulloq taanna oqaatigaa, aamma naak USA Danmarkilu tamarmik Natomi ilaasortaagaluartut USA-lu nunatsinni Sorsunnersuup Aappaanili sakkutooqarfeqaraluartoq.

Præsident Trumpip Kalaallit Nunaat tiguarniarneraa marsip 13-ianni aperineqarpoq. Taassumalu: - Taamaattoqarnissaa ilimagaara, akissutigaa.

Nuummiut USA-p nunatsinnik tiguserusunneranut akerliullutik marsip 15-ianni akerliussutsiminnik takutitsipput. Nunatta oqaluttuarisaanerani akerliussutsimik takutitsinerit annerpaartarigunarpaat.

Oqallittoqangaatsiarnerata aamma akerliussutsimik takutitsiniartoqarnerata kingunerisaanik amerikamiut præsidentiata tullersortaata, J.D. Vancep nuliata Sisimiunut tikeraarnissamik pilersaarutini taamaatippai. Taarsiulluguli aappartiit marsip 28-anni Pituffik Space Basemukarput, tassanilu tusagassiortunik katersortitsisoqarpoq.

The New York Timerip amerikamiut kalaallinut USA-mut ilanngutitsiniarnissamut - matumani pissaanermik sakkukitsumik aamma namminersortunut aningaasaliissuteqarnikkut soqutiginnitsitsiniarnissamut periusissiaat aprilip qulingani saqqummiuppaa.

Amerikamiut præsidentiata isertortumik paasiniaasartut soorlu CIA-mi NSA-mi DIA-milu pisortat Kalaallit Nunaannut tunngatillugu paasissutissanik katersinerannik annertuseeqqusimgai Wall Street Journalip maajip arfernani saqqummiuppaa. Tassani kalaallit USA-p anguniagaanut iluaqutaasinnaasut ataatsimut isigineqarsinnaalersinneqassasut ilaatigut peqqussutigineqarpoq. Tamanna pissutigalugu amerikamiut Kalaallit Nunaannut kilitsissiatut suliaqarsinnaanera immikkut ilisimasallit nunallu arlallit pasivaat.

Allisiguk

Demokraatineersup akineqarnissaminik tatisinnginnera sioqqullugu Hegsethip Kinamiut sunniuteqarnerat eqqartoqqaarpaa.

- Illersornissamut ministereqarfimmi suliassarput tassaavoq pilersaarusiorneq, Hegseth akivoq.

Taava Demokraatineersup aperivaa „tamatuma pinissaanut“ pilersaaruteqartoqarnersoq.

- Illersornissamut ministereqarfimmi suliassarput tassaavoq pisussanut tamanut pilersaarusiornissaq, Hegseth oqarpoq.

Qanorluunniit pisoqarsinnaaneranut piareersimaneq

Smith aperivoq „qanorluunniit pisoqarsinnaanera“ aamma „Danmarkimik tiguaanissamut“ tunnganersoq.

Demokratineersup apeqqutini naammassinngikkaalu illersornissamut ministeriaqarfimmi pisussanut tamanut piareersimasoqartoq Hegseth akivoq, tamatumalu kingorna Adam Smithip illersornissamut ministeri erseqqissumik akissuteqartinniarsaraa.

- Ersarissarluarumallugu - Panamap Kalaallit Nunaatalu tiguarnissaanut pisariaqassappat sakkutuulersornissaq pilersaarutigaarsi, Smith oqarpoq.

Aamma atuarukMacron: Kalaallit Nunaat tuniniagaanngilaq

USA-mi illersornissamut ministeri ima akivoq:

- Isumaqarpunga Amerikamiut kissaatigissagaat Pentagon (illersornissamut ministereqarfik, aaqq.) qanorluunniit pisoqarsinnaaneranut piareersimassasoq, Hegseth oqarpoq.

Kalaallit Nunaannik suleqateqarneq

Kingusinnerusukkut Republikanerit sinnerlugit kongressimi ilaasortap Mike Turnerip parteeqatimi Hegsethip oqaasii uterfigeqqippai.

- Ikiorniaannarpakkit, oqaatsitit eqqunngitsumik paasititsissutaaniarmata. Ullumikkut oqaaseqaatinni Pentagonimi Kalaallit Nunaata tiguarnissaanik sakkutuulersornissamik pilersaaruteqartoqarnera uppernarsanngilat ilaa? Taamatut oqanngilatit ilaa? Mike Turner aperivoq.

Tassunga Hegseth ima aperivoq:

- Pentagoni pisussanut assigiinngitsorpassuarnut piareersimasoq oqaatigisinnaavara.

Mike Turnerip taamaattunik pilersaaruteqartoqarnersoq apereqqippaa:

- Kalaallit Nunaata sakkutuulersornikkut tiguarnissaanut imaluunniit tiguarneqarnissaanut pilersaaruteqartoqartoq oqanngilatit, ilaa? Taamami oqarsimassasutit neriuutiginngeqaara.

Taava USA-mi illersornissamut ministeri ima oqarpoq:

- Kalaallit Nunaata navianartorsiortinneqarsinnaasunut tamanut sillimatinneqarnissaanik qulakkeerinninniarluni suleqatiginissaa qilanaaraarput.

/Ritzau

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.