USA-p iligisaalu Ukraine pillugu attaveqaatit aqqutigalugit ataatsimiilersut

Iligiit Ukrainemik tapersersuiniarlutik suliniutinik ataqatigiissaarisarneranni tamanna ileqquusoq, USA-mi atorfilittat ilaat nutaarsiassaqartitsivimmut AFP-mut oqarpoq, qassilli ataatsimiinnermut peqataanersut oqaatiginagu.

- Ruslandip iliuutsiminut akisussaatinneqarnissaa ataatsimiinnermi aamma suliniutigineqassaaq, atorfilittaq oqarpoq.

Ruslandip Ukrainep kangisissuani nunap immikkoortuani Donbasimi saassussinini sakkortusiartoraa Ukrainep præsidentiata Volodymyr Zelenskyj-p oqaatigereeraalu attaveqaatit atorlugit ataatsimiittoqalerpoq. Sorsunnerup Donbasimi sakkortusiartornissaa, Ukrainemi naalakkersuisut sapaatit-akunnerisa kingulliit ingerlaneranni ilimasaarutigisimavaat.

Canadami, Frankrigimi, Italiami, Polenimi, Rumæniami Tuluillu Nunaanni naalakkersuinikkut siuttut ataatsimeeqataaniartut, Ukrainemi inatsisartunut ilaasortap Lesia Vasylenkop inoqatinut attaveqaqatigiittarfikkut Twitterikkut oqaatigaa.

Nunat killiit illersoqatigiiffiata NATO-p qullersaa Jens Stoltenberg EU-milu siuttut taassuma saniatigut aamma peqataassapput, tassami EU-kommissionip siulittaasua Ursula von der Leyen, EU-llu ataatsimiittartoqatigiivisa præsidentiat Charles Michel peqataassammata.
 Russit sakkutuuisa Ukrainep illoqarfiisa pingaarnersaata Kyivip eqqaanit Donbasimut nuunneqareersullu, Ukrainep kangisissortaani kujataanilu sakkuaannerit sakkortusiartorput. Donbas Ruslandimik pingaartitsisunit 2014-imili aqunneqarpoq.

USA iligisaasalu Ruslandimut pillaatitut iliuutsinik assigiinngitsunik atuutilersitsisimapput, Ukrainelu sakkussanik assigisaanillu ilaatigut aamma pilersorlugu.

USA Ruslandimut pillaatitut iliuutsit nutaat pillugit maannamut tunuarsimaarsimavoq, Ruslandimulli pillaatitut iliuutsit sakkortusiartuaartinniarlugit maanna nalunaarutigalugu.