USA-p DK-mi aallartitaa nuannarineqarluarpoq

maajip 09-at 2006 17:28

USA-p Danmarkimi aallartitaa Nuummi Ilisimatusarfimmi ullumi oqalugiareermat ilinniartut apeqqutissaaleqinngeqaat – soorluuna oqalugiartoq sunniilluarsimasoq.

Ilisimatusarfimmi ilinniartut apeqquteqartut ilaasa James P. Cain, inuppalaarluinnartutut nalilerpaat.

Apeqqutivut eqqissimasumik inuppalaartuinnartumillu akisarpai, naak apeqqutissavut piareersarsimanngilluinnarigaluarivut.

Ilinniartunillu naapitsisimanini James P. Cainip nuannaarutigaa.

- Ilinniartut nunarsuarmi nunani allani ilinniartunit allaanerunngillat. USA pillugu, nunanullu allanut politikkitsinnik paasisaqarusupput.

Naapisimaarneq ilumoorsaarfiunngitsoq akunnermik ataatsimik sivisussuseqarpoq. Najuuttut sodavandinik kaageeqqanillu sassaalliivigineqarput. Ilisimatusarfiup immikkoortuinit sisamanit peqataasoqarpoq – apeqqutillu imaaginnavipput – USA-p nukissiuutinik uuliatortuunngitsunik sunik nukissiuuteqarnermiit, USA-mi ilinniarnissamut suut periarfissaanersut, sillimaniarnermilu USA-p politikkianik aperineqarpoq.

Aallartitap apeqqutigineqartut qiimmisaarluni akiortorpai – aammattaaq qaqugu Cuba-mi Guantanamo-mi paarnaarussivitsik matunialersaarneraat apeqqutigineqarmat akivaa. Ittorisami Buship ullut pingasut matuma siorna oqaaserisimasai issuarlugit apeqqut akivaa, tassalu USA-mi naalakkersuisut parnaarussivik matorusukkaat. Apeqqutigineqartumullu tupaallanngilaq.

-Tupaallaatiginngilara, akuttunngitsunimmi taannarpiaq apeqqutigineqartarmat. Pingaartumik Europami inuit pisinnaatitaaffiinik aallutaqartut apeqqutigigajummassuk.

Naggataagut aallartitap nassuerutigaa nuannarineruginini toqqaannartumik akisassanik aperineqartarnini – kalaallinissaaq.

USA-p Danmarkimi aallartitaa, James P. Cain, George W. Bushimit ukioq kingulleq juunimi ivertinneqartoq taama oqarpoq. Naalagaaffeqatigiinnerup iluani nammineerluni ingerlatsinissamut ataatsimiititaliamut Københavnimi pisussamut ingerlaqqinnginnermini aqagu Ilulissiassaaq.