USA-p Chengdumi sinniisoqarfini matussagaat Kinap peqqussutigigaa

Kinap Houstonimi sinniisoqarfini matussagaa, USA-p ullualuit matuma siorna peqqussutigaa.
Kinap USA-mi Texasimi illoqarfissuarmi Houstonimi sinniisoqarfini matussagaa, USA-p nunanut allanut tunngasunut ministereqarfiata ullut marluk matuma siornatigut peqqussutigaa. Assi © : Greg Baker/AFP/Ritzau Scanpix
Allattoq Ritzau
juulip 24-at 2020 09:21

USA-p Kinap kimmut kujasissuani illoqarfissuarmi Chengdumi sinniisoqarfini matussagaa, Kinap nunanut allanut tunngasunut ministereqarfiata piumasaraa.

- USA-p Chengdumi pisortatigoortumik sinniisoqarfiata atatiinnarneqarlunilu ingerlanneqarsinnaanissaanut Kinap akuersissuteqarnerata atorunnaarsinneqarnissaa Kinap USA-p Kinami aallartitaqarfianut nalunaarutigaa, Kinap nunanut allanut tunngasunut ministereqarfia taama nalunaaruteqarpoq.

USA-p Chengdumi sinniisoqarfiata Kinamit matuneqarsinnaanera inatsisitigut tunngavissaqarlunilu pisariaqartoq, Kinap nunanut allanut tunngasunut ministereqarfiata oqaatigaa.

Kinap USA-mi Texasimi illoqarfissuarmi Houstonimi sinniisoqarfini matussagaa, USA-p nunanut allanut tunngasunut ministereqarfiata ullut marluk matuma siornatigut peqqussutigaa.

Kinap Houstonimi sinniisoqarfini akunnerit tulliuttut 72-it ingerlaneranni matussagaa USA-mit pingasunngormat piumasarineqarpoq.

Kinap USA-mi illoqarfinni assigiinngitsuni sinniisoqarfii allat matuneqarsinnaanerat aamma periarfissaasoq, præsident Donald Trumpip pingasunngormat aamma oqaatigaa.

Kinap Houstonimi sinniisoqarfiata matuneqarnissaanut piumasaqaatip nalunaarutigineqarnerata kingorna, sinniisoqarfimmi ikuallatsitsisoqarneranik malussartoqartoq, Trumpip tusagassiortunik katersuutsitsinermi oqaatigaa.

- Pappllissanik paasissutissanik imaqartunik ikuallaasoqarnera eqqoriarneqarsinnaavoq, paasissutissamimita suut, Trump oqarpoq.