USA-p aallartitassaatut innersuussap Kalaallit Nunaannik suleqateqarnissaq upperaa
Ken Howery, USA-p præsidentiata Donald Trumpip Danmarkimi aallartitassatut innersuussaa, Kalaallit Nunaannik ammasumik oqaloqateqarnissaq suleqateqarnissarlu upperaa.
Sisamanngormat USA-mi senatip ataatsimiititaliaani tusarniaanermi taama oqarpoq.
- Kalaallit Nunaata siunissaanut Amerikap qanoq inissisimaffeqarnissaa pillugu qanittukkut oqallittoqangaatsiarsimagaluartoq, ammasumik oqaloqatigiinnikkut suleqatigiinnikkullu ataatsimut isumannaatsuunerup atugarissaarnerullu siuarsarnissaannut periarfissarsiorsinnaanerput upperaara, taanna oqarpoq.
Howery niuernermik suliaqartuusimavoq, aamma Elon Musk pisoorsuarlu Peter Thiel peqatigalugit akileeriaaseq PayPal pilersitseqataaffigaa.
Howery Elon Muskip ikinngutaatut aviisimi Salonimi nassuiarneqarpoq.
Trumpip præsidentiunerani siullermi USA-p Sverigemi aallartitaatut atorfeqarsimavoq. 2019-imit 2021-mut taanna atuuffigaa.
Ken Howery aallartitatut pingasunik pingaarnersiuiffigisaqarluni tusarniaanermi oqarpoq. Ataatsimut isumannaatsuunissaq, niuerneq issittumilu isumannaatsuunissaq pineqarput.
Danmarkimi, Kalaallit Nunaanni Savalimmiunilu taakku pingasut ukkatariumallugit oqarpoq.
Nunaminut kiffartorneq
Ken Howery senatimi tusarniaanermi USA-mi aallartitatut pingaarnersiuinerminik saqqummiussinermini ilaquttaminit nunaminut kiffartornissaq ilinniarsimallugu eqqaavaa.
Aatani sorsunnersuup aappaani Europami sorsussimasoq Danmarkilu ukiut 80-it matuma siorna aniguisinneqarmat sorsussimasoq oqaluttuarpoq.
Senatimi innersuunneqartunik tusarniaanermi ataatsimiititaliami ilaasortat nalinginnaasumik aamma apeqquteqarsinnaasarput.
Sisamanngornermili tamanna oqaatsitigut ingerlanneqarnissaa periarfissaanngilaq.
Taarsiullugu senatimi ilaasortaatitat tallimanngorneq tikillugu allakkatigut apeqquteqarsinnaapput, tamatumalu kingorna akuersissummik tunisineq ingerlanneqassalluni.
USA-p Danmarkimi aallartitarigallagaata Jennifer Hall Godfreyp nunanut allanut ministerimik ataatsimeeqateqarsimanerata kinguninngua tusarniaaneq pivoq.
Nunanut allanut ministerip Lars Løkke Rasmussenip (M) USA-p Kalaallit Nunaanni alapernaarsuinerulerniarnera pillugu tusagassiuutitigut allaaserisaq pissutigalugu aallartitaagallartoq oqaloqatiginiarlugu qaaqqusimallugu, pingasunngornermi oqarpoq.
