USA-p aallartitaa isumalluarpoq

Isumalluarpugut angusaqarumaarlutalu, USAp Danmarkimi aallartitaa Stuart Bernstein oqarpoq, nunat pingasut ataatsimiittartoqatigiivisa ataatsimeeqqaarnerannut tunngatillugu.

-Iluatsinnissaa kissaatiginarluinnarpoq, neriunaateqarlunilu, Stuart Bernstein oqarpoq, suleqatigiilernissamut isumasioqatigiinnerit aallartinnerat apeqqutigineqarmat, suliassarpassuunerarpaalu.

Suliassat pingaarnerit tassaapput ilinniartitaanermut, avatangiisinut kulturimullu anguniagassatut siunniussat. Ilanngullugu oqaatigaa isumaqatigiissut Kalaallit Nunaata kisimi pinnani USAlli pissarsiffigilluarsinnaagaa. Niueqatigiinnermullu qanittukkut Washingtonimi nangeqqinneqartussanut isumaqatigiinniarnissanut tunngatilluguttaaq isumalluarnerarpoq, annermillu takornariaqarnermi angusarineqarsinnaasut eqqarsaatigalugit.

USAmit Kalaallit Nunaannukartarnerup eqaannerusumik inerniliiviginissaata periarfissarsiuunnera isumalluarnarnerarpaa, pinngortitamillu takornariarneq nersualaarlugu, namminermi ilulissanik umimmannillu takornariarsimanini usorsisimaarutigeqigamiuk.

Illersornissamullu isumaqatigiissut Igalikumi atsioriartoramikku Kujataata pinnissusaa tupigusuutigisimanerarpaa.