USA-p aalisagaataanik tuniniaasalerniarput

marsip 11-at 2005 11:07

Nunatsinni suliffeqarfiit 20-t missaat nunarput pillugu Washingtonimi upernaaru pilerisaarinermi peqataassapput. Aalisakkanik nioqqutissiat takornariallu ilaatigut sammineqassapput.

Nunatta pilerisaarutigineqarnissaa tunngaveqarpoq nunatta Danmarkip USA-llu suleqatiginnerulernerannik. Suleqatigiinneq 90-ikkunnili ariitsumik piorsarneqarsimasoq nukittorsarneqaqqippoq illersornissamut isumaqatigiissutip nutarterneqarnera Igalikumi aasaq atsiorneqarmat.

Suliffeqarfiit nunatsinnik pilerisaarisussat 20-t ilagaat Royal Greenland, tassanilu neriuutigineqarpoq USA-mi aalisakkanik nioqqutissiortut nioqqutissiaannik tuniniaanikkut suleqatigiittoqarsinnaasoq

- Neriuutigaarput aalisakkanik nioqqutissiortunik attaveqalersinnaalluta sivisuumik isumalluutigisinnaasatsinnik Royal Greenlandip pisortaata tullia Henrik Leth oqarpoq.

Royal Greenland aalisakkanik 150.000 tonsinik ukiumut nioqquteqartarpoq, taakkunanngalu 50.000 tonsiinnaat nunatsinneersuusarput. Sinneri, 100.000 tonsit missaat nunanit allanit pisiarineqartarput, nioqqutigineqarlutillu. Nunanit allanit pisiat tamakku suli amerlisinniarneqarput, Royal Greenlandillu neriuutigaa pingaartumik Manerassuup kapisilii Alaskameersut Europamut Kangianullu Ungallermut tuniniartalersinnaallugit.

-Amerikami aalisakkanik nioqqutissiortut nioqqutissiatik akilersilluarnerusinnaassavaat uagut aqqutigaluta tuniniarneqartalerpata, Henrik Leth oqarpoq.

Royal Greenland nioqqutissiaminik USA-mut tuniniaaniarluni pilerisaarinermut ilaanianngilaq. Saattussanik nunatsinneersunik Royal Greenland USA-mut nioqqutissiorpoq, Amerikali nioqqutissianik tuniniaaffigissallugu pisariusorujussuusoq Henrik Leth oqarpoq.

-Nioqqutissiat akigissaanngillat, dollarillu nalinga allanngorartuartuummat tasamunga tuniniaaneq naatsorsuutaavallaanngilaq, Henrik Leth oqarpoq.

Greenland Tourism pilerisaarinermut aamma ilaassaaq. Tassani tuniniaanermi pisortaq Niels Kreutzmann oqarpoq takornariat USA-meersut ukiumut 2000-it Islandimukartartut nunatsinnukartalernissaat anguniarlugu tasamunga pilerisaariartoqataaniarlutik.