Amerikamiut aningaasaleeqqipput, Kalaallit Nunaata Amerikallu akunnerminni qileruteqarlualissutissaannik, taakkulu aningaasat 10,4 millioner dollarerpiaapput.

USA nunarput suleqatigalugu millioninik arlalinnik aningaasaliiniartoq

Kongressen USA nunarput suleqatigalugu suliniutinut atugassanik 10,4 millioner koruuninik aningaasaliivoq, taakkulu USAp nunatsinnut suleqateqarneranut nukittunerulersitsissasut, amerikamiut nunatsinni konsulitaavata oqaatigaa.

Suliniutinut siunertanullu aalajangersimasunut atugassanik USA nunarput suleqatigalugu, nunatsinni suleqatigiissutigineqartussat nukittorsarumallugit, ukioq kingulleq USA 12,1 millioner dollarinik aningaasanik aningaasaliivoq. Taakkulu koruuninngorlugit 83 millioner koruuninik naleqarput.

Aningaasat, Amerikami ilisimatusarfinnut Sisimiunilu aatsitassalerinermik ilinniarfimmut, aammalu Arctic Education Alliancemut atorneqartussanut ilaatigut naatsorsuussapput. Ilinniarfik kingulleq taaneqartoq nunatsinni silap pissusianik ilisimatusarfiuvoq, ilinniarfik nunatsinni Ilisimatusarfimmit akuuffigineqartoq suliniutinut paarlaasseqatigiiffiusartoq Amerikami ilisimatusarfiit ilaannit aqunneqartoq.

AAMMA ATUARUK Nunarput USA-lu inuussutissarsiornermi ilinniakkanik nutaanik suleqatigiissuteqartut

Maannalu tassa Amerikamiut kongressiat suliniutinut aningaasanik illikartitseqqippoq, taakkulu aningaasat nunatta USA-llu akunnerminni suleqatigiinissaanut nukittunerulersitsissapput. Aningaasallu 10,4 millioner dollariupput, danskit koruuninngorlugit 65 millioner koruuniusut.

Taama oqarpoq, Joanie Simon, taannalu arnaq tassaavoq Nuummi Amerikamiut aallartitaattut toqqarneqaqqammersoq.

- 10,4 millioner dollarsinik aningaassaliiffigineqarnissamik akuerineqaqqammerpugut, suliniutinut pilersaarutinullu aningaassaliissutit atornissaanut qilanaarpugut, aningaasallu sumut atorneqarsinnaaneranut kalaallinik isumasiuinissarput qilanaaraarput, taanna KNR-imut oqarpoq.

Konsuuleqarfik, Blinken aammalu aningaasat

Pingaarnertut siunertaavoq nunat taakku marluk akunneranni nukittorsaasoqarnissaa,taamaammalluuna kongresse USA Kalaallit Nunaanni suliniutinut aningaasaliisoq, taanna nassuiaavoq.

 

Joanie Simon juunimi nunatsinniilerpoq, amerikamiut konsuliattut Nuummi sulissalluni.

- Isumaqarpunga, USAp Kalaallit Nunaatalu iluminni tamarmik kissaatigigaat akunnerminni pissutsit nukittoreeraluartut suli nukittunerulersissallugit, Joanie Simon oqarpoq nangipporlu:

- Maani konsulaateqarfeqarnerput tamatumunnga takussutsissaavoq. Amerikallu nunanut allanut ministeriata Anthony Blinkenip USA-mi ministerinngortitsisoqatsiaannartoq Kalaallit Nunaannut tikeraarnera aamma immikkut takussutissaasoraara, tassami akunnitsinni nukiit tamaasa atorlugit ineriartortitsisoqaraluttualerpoq.

Amerikami naalakkersuisoqarfiit arlallit Kalaallit Nunaanut aningaasaliinermut aalajangersimasumut atugassatut tapeeqataapput. 

Sisimiuni aatsitassarsiornermik ilinniarfimmik suleqateqarneq

Assersuutigalugu amerikami nunanut allanut ministereqarfik Sisimiuni aatsitassarsiornermik ilinniarfimmut atugassanik aningaasaliivoq aammalu amerikami ilisimatusarfinnut marlunnut atugassanik aningaasaliilluni.

Periutsimi matumani pineqartoq tassaavoq, ilisimatusarfiit aningaasaliiffigineqarput Sisimiuni aatsitassalerinermik ilinniarfimmut arlalinnik suliakkiisinnaalerniassammata. taakkulu ilaatigut tassaapput atuarfiup taassuma ilinniartitsisuisa ilinniaqqinnissannut ammaassinissamut periarfissiineq, aammalu atuartitsinermi sakkussat atugassat soorlu aatsitassarsiornermi upalungaarsimanissamut periusissiat ineriartortitsinissaat matumani aamma eqqarsaataapput.

 

AAMMA ATUARUK Råstofskolen i Sisimiut indgår millionaftale med USA: - Det kommer til at spole skolen ti år frem i tiden

Suliassallu tamakkuupput Amerikamiut nunatsinnut aallartitartaavata malinnaavigissallugit qilanaarisai.

- Sisimiuliarnissara qilanaareqaara suliniutillu qanorpiaq ingerlaneri takussallugit, taama Joanie Simon oqarpoq, taanna qaammatip ataatsip matuman siorna nunatsinniilerpoq amerikamiut aallartitaattut sulissalluni.

Taassuma aamma eqqaavaa, amerikami nunap iluani ministeriaqarfik 12,1 million dollarit ilaannik aamma tapiissuteqarsimasoq.

Taakkulu aningaasat atugassaapput qarasaasiakkut ataatsimiinnernut soorlu Naalakkersuisut, kommunit aammalu takornarialeriffiit nunatsinniittut ataatsimeeqatiginerini atugassatut, taamaalillunilu isummanik avitseqatigiittoqarsinnaaniassammat.
 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl