USA niueqatigissavarput

Kalaallit Nunaanni Takornariaqarnermi Inuussutissarsiornermilu Siunnersuisoqatigiit aaqqissugaannik USA-mut inuussutissanik tunisassiorsinnaanissaq ujartorneqarpoq.

Isumassarsioqatigiinneq Katuami pisussaq ulluni marlunni ingerlanneqartussaq aqagu aallartissaaq pingasunngorpallu naammassineqarluni.

Aningaasaqarnermut nunanullu allanut tunngasunut naalakkersuisoq Aleqa Hammond isumassarsioqatiginnermik ammaassaaq. USA-mi inuussutissarsiornikkut pissutsit atuuttut pillugit isumassarsioqatigiinnermi nassuiaasoqassaaq, nunattalu USA-mut tunisassiarisinnaasai suuneri ersarissarneqarluni.

Kalaallit Nunaata avammut tunisassiarisinnaasaasa suuneri, danskit Washingtonimi aallartitaqarfiata USA-mut nittarsaatissagai takorloorneqarpoq.

Tunisassiassatut tuttup aamma umimmaap neqaa ilaatigut assersuutigineqarput, aalisakkanillu tunisassiarineqarsinnaasut aamma assersuutigineqarlutik.

Isumassarsioqatigiinnermut Kalaallit, danskit Amerikamiullu Igalikumi 2004-mi isumaqatigiissutaat tunualiaqutaavoq.