U.S.A-mut saassusseqataasoq toqutaassanersoq eqqarsaatigaat

2001-imi U.S.A-mik saassussinermi timmisartunik qimarngussisut 20-attut taaneqartup Zakarias Moussauip eqqartuunneqarnera naammassigaluttuarpoq. Eqqartuussinermi inuinnaat aalajangiiniartitat aalajangertussanngorpaat toqumut pillagaassanersoq, inuunermiluunniit sinnera parnaarunneqassanersoq.

U.S.Ami naalagaaffimmi Viginiami, illoqarfimmi Alexandriami eqqartuussineq ingerlanneqarpoq.

Unnerluussisoq tunngavilersuutiminik saqqummeereermat, maannakkorpiaq illersuisoq saqqummiivoq; kingorna eqqartuussinermi aalajangiiniartitat inuinnaat aalajangiisunngussapput.

Timmisartut sisamat aallarunneqarnerisa nalaani Zakarias Moussaui pinerliiniartutut pasisaalluni parnaarussaaqqavoq, nassuerutigaalu parnaarussaasimanngikkuni aallarusseqataasimasinnaanini. Aalajangiisussallu peqataasimasutut nalilerlugu toqumut eqqartussassanngortissinnaavaat.

Unnerluussisup David Rushkinip Zakarias Moussauip ajussutsi pillugu nunarsuatsinni inissaqannginerarpaa, toqumullu pillagassaatillugu.

Eqqartuussisulli erseqqissaatigaa toqumut pillagaappat uppeqatiminit toqunermigut nalunaajaasutut isigineqalernissaa.

Eqqartuussinermi aalajangiisussatuat inuinnaat ualeru nunatta nalunaaqutaa naapertorlugu tallimat missaani aalajangissavaat Moussaui toqumut pillagaassanersoq.