USA-miut nunarput pillugu ilisimasaqanngillat
Kalaallit Nunaat qeqertarujussuuvoq sikuinnangajak, silaannaallu kissatsikkiartornerata piliaanik sikua aakkaluarpat Amerikap sineriaani qarsutsineqassaaq.
Eqikkarujussuarlugu taamatut tassa Amerikamiut nunarput pillugu tusagassiutini paasitinneqartarput.
Danskip arnap Stine Dudda-mik atillip aningaasarsiornerlu pillugu ilinniagaqartup sivisuumik misissorlugulu nalilersoreerlugu Amerikamiut isaannik nunatsinnut isiginninnerat pillugu inaarutaasumik illersuilluni misilitsissuteqarpoq, 13-inimik angusissutigisaminik taamatullu aatsaavissuaq misissuisoqartoq oqaatigineqarpoq.
Stine Dudda aperaarput Amerikamiut 1000-t nunarput pillugu ilisimasaat apersuutigisimagaa, taakkulu qanoq akisimanersut.
- Amerikamiut Kalaallit Nunaat pillugu ilisimasakitsuararsuupput.
Assigiinngitsunik marlunnik apeqquseqaasiorpunga, apeqquteqaatit siulliit Amerikamiunut nalinginnaasunut tulluarsagaapput, apeqquteqaatillu aappaat Amerikamiunut Kalaallit Nunaannut takornariatut tikissimasunut tulluarsagaallutik.
Amerikamiunut nalinginnaasunut apeqquteqaatini akissutigineqartut assorujussuaq siammasipput. - Siku, aput, qeqertarujussuaq tamaani arlaanniittoq aap immaqa Canadap eqqaaniittoq. Tassa taamatupajaaq Amerikamiut Kalaallit Nunaat pillugu ilisimasaqarput. Tamakkulu Kalaallit Nunaannukariataassagaluarunik assorujussuaq tupaallassagunarput inuuneq inuillu kulturilu malugisupilussuanngussagamikku. Apeqquteqaasiarisanni assigiinngitsuni marluusuni erserpoq Kalaallit Nunaat qanoq tupinnartuliaatigigaluarluni akerlianilli qanoq ilisimaneqanngitsigisoq, Stine Dudda oqarpoq.
Nangipporlu:
- Tusagassiutini Kalaallit Nunaat takutinneqaraangat siammasissorujussuarmik oqaluttuariniarneqartarpoq, soorlu silaannaap kissatsikkiartorneranut atatillugu oqaluttuarinerusarlugu. Taamaalillunilu navianartutut isigineqartussanngorlugu, soorlu Kalaallit Nunaanni sermersuaq aakkaluarpat Amerikap sineriaani qarsutsineqarnissaa oqaluttuarineqartarluni, Stine Dudda oqarpoq.
Taanna qalleqqissaavoq Amerikami angalatitsiviit Kalaallit Nunaat pillugu aamma soqutiginnippallaanngitsut, ilaatigut oqartarsimasut imaassinnaanngitsoq Amerikamiut 300 millionit nunatsinnut takornariartinneqarsinnaassasut.
Kalaallit Nunaannullu takornariartartut tassaanerusarput Amerikamiut utoqqaat ilinniarluarsimasut nunarpassuarnullu angalasarsimagamik suli takusimanngisartik naggasiutitupajaaq pillugu Kalaallit Nunaat takusaraat, Stine Dudda oqarpoq.
Stine Dudda ”Kalaallit Nunaata USA-miit isigineqarnera”-nik qulequtserlugu Københavnimi Handelshøjskolemi misilitsissutini 13-imik angusaqassutigaa, maannalu tassa cand. Merc.-inngorpoq.
Aqagu ullaakkut tusarneqarsinnaavoq Stine Duddap Nunatsinni Takornariaqarnermi Inuussutissarsiornermilu Siunnersuisoqatigiinnut Amerikamiut nunatsinnut soqutiginnilersinneqassappata qanoq iliortoqarsinnaaneranik siunnersuutaa.
