USA-mit Nuummut timmisartuussinissaq siulleq ulikkaangajalersoq
Amerikamiut illoqarfissuanit New Yorkimit nunarsuarmi qeqertat annersaannut Kalaallit Nunaannut silaannakkut angallanneq arfininngornermi pisortatigoortumik atulerneqarpoq.
Mittarfimmit Newarkimit nunanit tamalaanit mittarfimmut Nuummut timmisartoq siulleq nalunaaqutaq 18.45 tikissaaq.
Timmisartumi inissat arfininngornermi ullaap tungaani ikittuinnanngorsimasut, timmisartuutileqatigiiffiup nittartagaani allassimavoq.
Aqqummi nutaami septembarip tungaanut sapaatip akunneranut marloriarluni timmisartuussisoqartartussaammat nunatsinnut tikeraat amerlanerulingaatsiarnissaat naatsorsuutigineqarpoq.
Kalaallit takornariaqartitsiviat, Visit Greenland Ritzau-imut allakkatigut akissummi paasissutissiivoq.
- Nunatta tikikkuminaannerani unammillernartuni annerpaasoq misissuinitta takutinnikuuaat. Maanna tikinnissaq ajornaannerulerpoq, taamaammat tamanna inuiaqatigiinnut angalasussanullu qularnanngitsumik iluaqutissartaqarpoq.
Oqaluttuarisaanermi pingaaruteqartoq
Nunatsinni mittarfiit pisortaanerata, Jens Lauridsenip ulloq "oqaluttuarisaanermi" pingaaruteqarnerarpaa.
- Iluatsissimanera nunarsuarmullu aqqummik aamma innuttaasunut, inuussutissarsiornermut nunatsinnullu tamarmut nutaanik periarfissiinera tulluusimaarutigaarput, taanna tusagassiuutinut Check-in.dk-mut oqarpoq.
United Airlinesip timmisartuutileqatigiiffiup Boeing 737 MAX 8-aa 168-inut inissaqartitsisoq atussagaa naatsorsuutigineqarpoq.
Arfininngornermi timmisartuussineq ulikkaangajalluinnarsimasoq United Airlinesip nittartagaani allassimavoq. Arfininngornermi ullaakkut inissat 14-iinnaasut, timmisartuutileqatigiiffiup nittartagaani allassimavoq.
Danmarkimit Nuummi mittarfimmut nutaamut siorna novembarimi siullermeertumik timmisartuussisoqarpoq.
Københavnip Nuullu akornanni timmisartuussineq akunnerit tallimat missaannik sivisussuseqarpoq, illoqarfiillu pingaarnersaannut ajornaannerusumik tikittoqarsinnaalerpoq. Siusinnerusukkut Kangerlussuarmut akunnilluni meqqaarnissaq pisariaqaraluarpoq.
Mittarfik naalagaaffeqatigiinni ukiorpassuarni kingullerni attaveqaasersuutini suliarineqartut annerpaartarisaanni suliaqarnerup aqqutaani arlalinnik unammillernartoqarpoq.
Mittarfiup nutaap sanaartornera mittarfiullu nutaap 2200 meterinik takissuseqartup akuerineqarniarnera sivisuvoq.
Mittarfilli nutaap siusinnerusukkut 950 meterinik takissuseqartup atulerneratigut Københavnimit, Europamit nunarsuullu sinneranit timmisartut anginerusut illoqarfiit pingaarnersaannut tikissinnaalerput.
