USA-mit avissaarnertik nalunaarutigaat

Frankrigimi tusagassiorfiup AFP-p ullumi allaaseraat Lakota-indianerit USA-miit avissaarlutik namminneq immikkut naalagaaffeqalerniarlutik nalunaartut. Eqqillit Lakota-t Nebraskap, South Dakotap, North Dakotap, Montanap Wyomingillu nunataasa ilaat namminneq nunamittut isigaat.

Eqqillit USA-milu naalagaaffiit kattuffiata Washingtonimi qullersaqarfianik isumaqatigiissutitik tamaasa atorunnaarsissimavaat. Isumaqatigiissutit ilaat ukiut 150-it matuma siorna atsiorneqarnikuupput.

Isumaqatigiissutaasimagaluartut saneqqutaarlugit kulturiminnit nunaminnillu tilligartoqartarsimanera inooriaatsiminnillu attassiinnarsinnaanertik ataqqineqanngitsut avoqqaaralugit, Lakotat nittartakkaminni ilaatigut allaaseraat.

Eqqillit Lakotat 70.000-it sinneqalaarput naatsorsueqqissaarnerillu takutippaat inuunerloqisut. Lakotat angutit USA-mi inuunikinnerpaallutik 44-nik ukioqalertarput, Lakotallu akornanni imminut toquttarnerit USA-p sinneranut naleqqiullugit 150 procentimik qaffasinnerupput.