Naak nunarsuaq tamakkerlugu corona tunillaassuukkaluartoq angutit assammik arsarnermik Igitsinimi ullualuit qaangiuppata pissartanngorniuuttussaapput.Assi: RitzauScanpix

USA-mit assammik arsartartut nunarsuarmi pissartanngorniuuttoqannginnerani coronamik tunillatsittut

Amerikamiut assammik arsartartui angutit 18-it coronamik tunillatsissimapput. Assammik arsartartut taakku Igitsinimi assammik arsarluni nunarsuarmi pissartanngorniuunnissamut nunatsinneersut toqqarneqaratik toqqarneqarnikuupput.

Igitsinimi assammik arsarluni nunarsuarmi pissartanngorniuunnissaq sapaatip akunnerata tulliani aallartittussaq sioqqullugu unammisussat ataatsit corona pissutigalugu sanngiinnerulereerput.

Tassa USA-mit unammisussat, unammisussammi 18-it tamarmik tamanut uissuummissutaasumik covid-19-imik tunillatsissimapput. Unammisartut sungiusaasut Sverigemiu, Robert Hedin aamma tunillatsissimavoq.

Danskit tusagassiorfii qassiuusut, matumani TV2 ilanngullugu taama allaaserisaqarput.

AAMMA ATUARUK Assammik arsarnermi VM-mut kalaallit peqataassanngillat

Unammisartut ataasinngormat sukkasuumik misissortipput, tassanilu tamarmik tunillatsissimanngitsutut uppernarsarneqarlutik. Misissuinerniilli siusinnerusunit unammisartut tamarmik 18-iullutik tunillatsissimasut uppernarsarneqarpoq.

Amerikamiut nunanut allanut unammisartui maanna Danmarkimi sungiusartarfimmiipput, tassanilu Ribe-Esbjergimut sungiusaataasumik misiliummik sapaatip-akunnerata siuliani tallimanngornermi unammillutik. Sungiusaataasumik misiliummik unamminissap aappaa Sønderjyskenut sapaammi ingerlanneqartussaagaluartoq taamaatiinnarneqarpoq.

Tjekkiamiut aamma ajornerusumik inissisimapput. Europamiut nunanut unammisartut unammisartuminni coronavirusimik tunillatsissimasoqarnera pissutigalugu peqataanissaminnik taamaatitsipput. Unammisartunit aqqaneq-marluk tunillatsissimasutut uppernarsarneqarsimapput. Tamanna tjekkiamiut tusagassiorfiisa ilaatigut sport.cz-ip aamma lidovky.cz-ip allaaseraat.

Nunarput unammiartornani USA unammiartortussaasoq

Nunarput nunarsuarmi pissartanngorniuuttoqarnissaanut maanna kissassileruttorsinnaagaluarpoq.

Nunat tamalaat akornanni assammik arsartartut kattuffiata, IHF-ip nunatta peqataannginnissaa upernaaq aalajangerpaa, USA-lu peqataasussanngortillugu.

Nunap immikkoortuanit unammiuaartoqarnissaanut unammisartut ataasiinnaat inissaqartinneqarnerat tamatumani pissutaavoq, tamannalu coronap aarlerinarnera pissutigalugu unamminikkoorani allaffissornikkut aalajangerneqarpoq.

AAMMA ATUARUK Kalaallit assammik arsartartut VM-imut pakatsisut: Aningaasat ajugaapput

- Aalajangerneq taanna isumaqatiginngitsorujussuuarput pakatsissutigalugulu, TAAK-imi siulittaasoq, Jørgen Isak Olsen KNR-mut novembarimi oqarpoq.

Taamaammat TAAK-ip aalajangerneq taanna IHF-imut naammagittaalliutigaa.

USA nunarsuarmi pissartanngorniuuttoqarnissaanut suli ilaaniarpasippoq, unammisartunimmi aqqaneq-marluk suli peqqipput. Inissitserneralli sulissutigineqalaassasoq, USA-mit unammisartut sungiusaasuat, Hedin TV2-mut oqarpoq:

- Illersuisoqanngigut, taanna oqarpoq, nangillunili:

- Målmandeqarpugulli.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat