USA-p Kina qullartaasiarujussuarmik alapernaarsuisutut pasigaa
Amerikamiut illersornissakkut ministereqarfiata Pentagonimiittup maanna pasitsaappaa, ballonerujussuaq qullartaasiaasoq USA-lu qulaavaallugu timmiuaartoq kinamiut kilitsisiaannut attuumassuteqarsoralugu.
Taama amerikami atorfilittaasut ippassaq sisamanngornermi tusagassiutinut oqarsimapput.
Amerikamilu tusagassiorfik ABC News naapertorlugu oqaluttuarineqarpoq qullartaasiaq taanna angisoorujussuusoq, bussinut pingasunut angissusaa nallersuunneqarsinnaasoq.
Amerikamiu atorfilittaq aterminik isertuussisoq oqarsimavoq amerikamiut qullersaqarfiisa qullartaasiarsuaq taanna ullualuit matuma siornali Amerikami qulaavaaqqaalermalli alaatsinaallugu aallartissimagitsik.
AAMMA ATUARUK Kinap amerikamiut Asiamilu iligiit ikioqatigiilernerat eqqasuutigigaa
Amerikamilu sakkutooqarfiit nalilersorsimagaluarpaat qullartaasiap Montana qulaammagu aallaanialersaaleraluarlugu, isumannaallissaanissarli pillugu taamaaliunngiinnarsimallutik.
Pentagonimiillli isumaqartoqarpoq, naalagaaffimmut pinartumik ajoqutaanaviarunanngitsoq.
Ippassarlu sisamanngornermi kingusissukkut canadamiut illersornissaqarfiat aamma paasissutissiivoq, qullartaasiarujussuarmik ballonimik nakkutilliissutaagunartumillu qullasittorujussuarmilu ingerlaartumik allagisaqarlutik taannalu nalunaarsuleritsik.
Taakkuli itinerusumik oqaatiginngilaat, ballonerujussuaq taannaanersoq USA-mi takuneqartoq imaluunniit amerikamiusulli Kinamiit kilitsissiaasorineraat.