Inuit Circumpolar Conference USA misigittaatsumik pissusilersorpoq
- Oqaatsit uku - "silap pissusaata allanngoriartornera" - atoqqusaannginnerat misigittaatsumik pissusilersorneruvoq. ICC-p nunani tamalaani siulittaasua Dalee Sambo Dorough taama oqarpoq.
ICC naggueqatigiit Inunnut Kalaallit Nunaanni, Canadami, Alaskami Tjukotkamilu katillugit 165.000-it missaanniittunut sinniisuuvoq.
- Issittumi Siunnersuisoqatigiit siulittaasuuffiup ukiut allortarlugit nikittartup naanerani, siullermeerutaasumik atsiukkamik nalunaaruteqartoqanngilaq, tamannalu isumaqatigiinneq tunngavigalugu suliniaqatigiiffimmi ingerlasumi, siunissamut annertuumik aarlerisitsivoq, Dalee Sambo Dorough oqarpoq, nangillunilu:
- Naggueqatigiit Inuit pinngortitap pissusaata allanngoriartornera ullut tamaasa misigisarparput. Amerikap naalakkersuisui oqaatsinik pinnguarniannguartut, uagut Inuit pinngortitap pissuaata allanngoriartornerata kingunipilui misillerfigaagut. Uagummi inuunerpullu? Dalee Sambo Dorough aperivoq.
USA-p pissusilersuutai ICC Kalaallit Nunaannit aamma apeqquserneqarput:
- Issittumi Siunnersuisoqatigiit tutsuiginassusiat taamatut mangiarneqarmat aarleqqutigaarput, tamannlu pivoq issittumi ataatsimoorussamik isummersornissap pisariaqaleruttorfiani, Kalaallit Nunaanni ICC-p siulittaasua Hjalmar Dahl, ippassaq ataasimeereernerup kingorna oqarpoq.
- Isumaqatigiinneq tamanna naggueqatigiinnut Inunnut issittormiunullu tamanut pingaaruteqarpoq, soorlu aamma nunarsuarmioqataasut sinnerannut pingaaruteqartoq. Silap pissusaata allanngoriartornera, issittumilu pisut nunarsuarput tamakkerlugu sunniuteqartut, ICC-p siulersuisui taama erseqqissaapput.