Lektori: USA-mik suleqateqarneq uummarissaqqinneqarsinnaavoq

USA-p Joint Committeekkut suleqatiginissaa siunertaq malillugu naammassineqanngisaannarsimasoq, danskit illersornissaq pillugu immikkut ilisimasalik isumaqarpoq. USA-lli Kalaallit Nunaannut soqutiginninnerulernera ataatsimiititaliamik eqeersimaarnerulersitsisinnaasoq naliliivoq.

- Kaffisoqatigiittarfiinnaasaavoq.

illersornissaq pillugu Københavnimi ilisimatusarfimi lektorip, Jon Rahbek-Clemmensenip ataatsimiittarfik, Joint Committee 2014 tikillugu taama innerarpaa. USA-p, nunatta Danmarkillu susassaqarfiit Kalaallit Nunaannut USA-mullu illua tungeriinnut iluaqutissartaqartut ataatsimiittarfimmi 2014-imiilli suleqatigiissutigisarpaat, USA-llu sakkutuuisa Pituffimmiissinnaanerannut qujassutaalluni.

Ataatsimiittarnerni ilaatigut ilinniartitaaneq, peqqinnissaq kulturilu pillugit aamma suleqatigiinnissat oqallisigineqartarput.

Ataatsimiittarfiulli pilersinneqarnerani Kalaallit Nunaata suleqatigiinnissamut naatsorsuutigisai iluamik tikinneqartanngillat.

Namminersorlutik Oqartussani qaffasissumik atorfilinnik nalunaarummi “Playing the Greenland Card”-imik peqataasut oqaloqatigineri aallaavigalugu, Jon Rahbek-Clemmensen taama naliliivoq.

AAMMA ATUARUK Kinap Kalaallit Nunaanni ingerlataqalernissaanut USA ammaasseqataasinnaavoq

- 2014 sioqqullugu ukiut qulit ingerlaneranni neriuutigineqartutulli annertunerusumik suleqatigiittoqanngitsoq erseqqarissivoq. Piviusumillu Joint Committee aaqqissuussatut ingerlanngitsutut pilerpoq; ataatsimiittarfik, naapiffiusinnaasoq angusaqarfiunngitsorli, Jon Rahbek-Clemmensen oqarpoq.

Isumaqatigiinniarnissamut periarfissagissaarnerusoq

Namminersorlutik Oqartussalli danskit naalagaaffiallu USA-mut Joint Committeemi ataatsimeeqatiginnittarnermik aallartitseqqinnissamut maanna piareerput.

Joint Committee og Permanent Committee
 

Joint Committee Igalikumi isumaqatigiissut aallaavigalugu 2004-mi pilersinneqarpoq. Matumani nunatta, Danmarkip USA-llu akornanni suleqatigiinnerit assigiinngitsut ilaatigut ilinniartitaanermut, peqqinnissamut, ilisimatusarnermut kulturimullu tunngasut oqallisigineqartarput. Tamanna USA-p sakkutooqarnikkut nunatsinniinneranut taarsiissutitut taaneqarsinnaasumik atorneqarpoq.


Permanent Committee 1991-imi USA-p Kangerlussuarmi mittarfik tunniummagu pilersinneqarpoq. Matumani USA-p nunatsinni sakkutooqarnikkut suliai pillugit paasititsisoqartarpoq.

Nunarput Danmarkiluunniit qaqugu ataatsimeeqatigiinnermik aallartissanersut nunamut allanut tunngasunut ministereqarfiup nunanulluunniit allanut tunngasunut naalakkersuisoqarfiup paasissutissiissutiginngilaat.

USA-li nunatsinni mittarfinnik alliliinissamut illersornissamut inunnillu sullissinermi iluaqutissartaqartumik taperseeqataarusulluni qanittukkut nalunaarutigineqarnera  pissutaaqataasinnaasoq, Jon Rahbek-Clemmensen isumaqarpoq.

AAMMA ATUARUK 'America First' isumaqatigiinniarnernut nutaanut ajornakusoortitsisoq

Joint Committeemili ukiuni sisamani ataatsimiinngisimaarnerup ataatsimiittaleqqinnerit imaqarnerulersissinnaagaat, taanna naliliivoq.

- Kalaallit Nunaata sillimaniarnikkut inissisimanera USA-p Kalaallit Nunaanni soqutiginnikkiartornerani allanngorsimavoq. Taamaalimmallu Kalaallit nunaat Danmarkilu isumaqatigiinniarnissani aallariarfigissaarnerulerput. Tamannalumi USA-mi aamma nalunngilaat.

Pituffimmilumi sullissinissamik isumaqatigiissutissamik isumaqatigiinniarnerit sivitsoruttut USA-p nunatsinnik soqutiginninnerulerneratigut naammasseqqajaalersinnaasut, Jon Rahbek-Clemmensen naliliivoq.

- USA-p najuunnini Kalaallit Nunaannut arlaatigut taarsiuteqarfiussasoq aamma nalunngilaa. Taamaammat taama taarsiuteqarfissarsiorfissaq nalunanngitsumik Joint Committeemiissaaq. Taamaammat Kalaallit Nunaannut iluaqutaasumik USA-p suleqatiginerulernissaanut oqallisiginnittoqalernissaanut tamanna takussutissaasutut takusinnaavara, lektori oqarpoq.

Namminersorlutik Oqartussat aamma Danmarkimi nunanut allanut tunngasunut ministereqarfik Joint Committeemi qaqugu tulliani ataatsimiittoqarnissaanut suli ulluliinngillat, tamannali kingusinnerpaamik 2019-imiussasoq naatsorsuutigineqarpoq.

AAMMA ATUARUK Pituffik pillugu isumaqatiginninniarnermi piviusorsiunngitsumik piumasaqanngilagut

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat