USA-miit toqqaannartumik umiarsuakkut assartuisarneq unippoq

Umiarsuakkut amerikap avannaaniit Narsamut tulalluni assartuisarneq Islandimiut umiarsuaatileqatigiivinit Eimskipimit ingerlanneqartarsimagaluarpoq, tamannali tassa allanngorpoq Eimskipip assartuumminik ingerlatsinera nutartermat.

Nutarterinerup kinguneraa assartugassat Canadameersut USA-meersullu Reykjavikkikkoorteqqaartalissammata. Royal Arctic Line-imiit ilisimatitsissutigineqarpoq Eimskipip ingerlatsinini ullut qulit sapaatillu akunneranut marlukkaartumut allanngortimmagu, taamaattumillu amerikap avannaaniit akulikinnerusumik aallartarnini ingerlatilerlugu, Royal Arctic Linep Reykjavikkimut sapaatip akunneri pingasukkaarlugit tulattarnini allanngortinngilaa.

Eimskipip allanngortitsinerata sullissinermut kinguneqarnerlussinnaanera Roayl Arctic Line-imiit ilisimatitsissugineqarpoq, tamannalu pisinnaanerarpaat amerikap avannaaniit umiarsuup takkuttup Kalaallit Nunaannukartumut angumersinngitsoorpat, taamaalisoqarneranimi assartukkat sapaatip akunneranik pingasunik kinguaattoorsinnaassapput.

Royal Arctic Linep nittartagaani allaqqavoq 2000-imi toqqaannartumik assartuussisarneq aallartimmat Kalaallit Nunaanni atuisunit soqutigineqaleraluttuinnarsimasoq, ingammillu biilinik, angallatinik qamuteralannillu assartuussinernut atorneqarluarsimasoq.