USA-miit takornariarsinnaasunik pilerisaareqqinnialerput

Destination Avannaa Kalaallit Nunaannilu Takornariaqarnermi Inuussutissarsiornermilu Siunnersuisoqatigiit, GTE, USA-miit Nunatsinnut takornariarsinnaasunik pilerisaariniarlutik misileeqqilerput.
Allattoq Mads Lynge
februaarip 20-at 2009 05:20

Aningaasaqarnikkut ajalusoornerup kinguneranik Amerikamiorpassuit aningaasakillioraluartut taamaattoq Destination Avannaata pisortaa Klaus Berg GTE-meersorlu Nini Biilmann Avannaa angalaffissaqqissutut nittarsaakkiartorlugu New Yorkiliarlutillu Chicagoliarsimapput.

Destination Avannaata GTE-llu siorna februaarimi Explorers Clubimi New Yorkimiittumi ataatsimeersuartitsinerisa ilassutaatut angalapput.

- 2008-imi nittarsaassineq iluatsissimanngilaq, Kalaallit Nunaata Baltimorellu akornanni timmisartukkut aqqutip sapaatip akunnerini arlialuinnannguanik ammaraluanera matuneqarmat.

Silap pissusaata kiatsikkiartorneranut tunngasut Amerikami ataatsimeersuarnerni soqutigineqartartorujussuupput, nungusaataanngitsumillu ingerlatsiviusinnaasut sammineqarluartarlutik. Amerikamiut Kalaallit Nunaat taamatut isigigaat, Klaus Berg Sermitsiamut oqarpoq.