USA-miit Australiamut angut ipuinnarluni ingerlaartoq
Taassuma ullut 209-it uninngani ingerlaarfigigai, Australiami tv-qarfissuaq ABC nalunaarpoq.
Beeden, Australiap avannamut sineriaanut ullumi apuuppoq, tassa sømilit 7.400-ut ipuinnarluni ingerlaareerluni. Illoqarfimmullu Cairnsip umiarsualivianut tulalermat inuppassuarnik niuffiorneqarpoq, taakkununnga ilaallutik nulia paniilu marluk.
John Beeden aatsaat kisimiilluni ungasissumut ipuinnarluni ingerlaalinngilaq. Ukiut pingasut matuma siorna ipulluni ingerlaarfigaa Atlantikoq. Tassalu tamatuma kingorna Manerassuaq ipuffiginiarlugu aalajangerpoq tamannalu pilersaarusiulerlugu.
- Taama ungasitsigisumut aamma siullersaallunga ipuinnaq ingerlaarnera pikkunarpoq apuunneralu upperinngitsutut suli misigaara, 53-inik ukiulik, John Beeden oqarpoq.
Taassuma illoqarfik San Francisco juunip aallaqqaataani avaliffigaa, umitsiaq isikkanik arfinilinnik takissuseqartoq angallatigalugu.
