USA-mi uuliap akia
Uuliap akiata qaffasinnera akiorniarlugu USA-p præsidentia George Bush sukataarpoq.
Akit qaffasingaarmata Amerikamiu benziinarsissaguni liiterimut 5 koruunimik allaat akiliisariaqalermat, nunap imminut illersorsinnaaneranut attuumassuteqalersoq, BBC allappoq.
Præsidentip ippassaq Washingtonimi oqalugiarnermini oqarpoq biilinut ikummatissanik allaanerusunik ujaasisoqartariaqalersoq. Ikummatissanik allaanerusunik taaneqartunut ilaavoq ethanol, tassaasoq aalakoornartoq. Ethanolimik atuilernikkut USA-p uuliamik pinngitsuuisinnaannginnera millissasoq, Bush isumaqarpoq.
Uuliap akiata piaartumik appartinnissaa Bush-ip angorusuppaa. Taamaammat uulianut peqqumaasivissuit immerneqannginnissaat siunniunneqarpoq, uuliaasivinni nalinginnaasuni uuliaatigisaq atorluarneqarnerulissammat, akikinnerulerneranik kinguneqassagunavissumik.
George Bush-ip oqalugiaataa sunniuteqalereerpoq, oqalugiarneratami kinguninngua uuliap akia appalaareerpoq.