USA-mi ullumi qinersineqarpoq
Demokraatit præsidentimut qinigassanngortitaat Barack Obama qinersisartut isumasiorneqarnerat malillugu siuaqqavoq. Nuna tamakkerlugu isumasiunermi Obama tallimanit 13 procentit tungaannut siuaqqavoq. USA-mi naalagaaffiit ilaanni qularnaatsumik Obama-mik Mc Cain-imillunniit qinersisassanersut ilisimaneqartanngilaq, naalagaaffinnilu taakkunani Obama aamma siuaqqavoq, isumasiunermi tamanna erserpoq.
USA-mi præsident-imut qinersinermi qinersisartut aatsaat taamak amerlatigisut qinersiartornissaat alaatsinaatsunit ilimagineqarpoq, tamannalu Barack Obama-p iluaqutigissagaa oqartoqarluni.
Qinersinermi inernerit unnuaru paasinarsissapput.
Barack Obamap aanaava 86-inik ukioqarluni krafte-mik nappaateqarluni sapaatiummat toquvoq, Barack Obamap peroriartornerani sunniuteqarluinarsimasoq, tusagassiuutit allaaserinninnermi taamatut issuaapput.