Demokratit isumaqatigiinniarnermi angorusutatik tamaasa iluatsissimanngitsut, senatimi demokratit qullersaata Chuck Schumerip nassuerutigaa, ilorraalli tungaanut alloriartoqarnera nuannaarutigaa.Assi: Senate Democrats/flickr

USA-mi senatip sakkunut inatsimmik sukaterinissamik siunnersuut akuerigaa

USA-mi senatip inuit pillugit paasissutissanik sukumiinerusumik misissuisoqarsinnaanissaanik sakkunullu inatsimmik sukaterinissamik siunnersuut akuerigaa, nutaarsiassaqartitsivik Reuters allappoq.

USA-mi senatip sakkunut inatsimmik sukaterinissamik siunnersuut danskit nalunaaqutaat malillugu unnuaq akuerivaa. Siunnersuummut akuersisut 65-iupput, akerliusullu 33-ullutik.

Nutaarsiassaqartitsivik Reuters taama allappoq.

Taasinerup inernera uissuumminartoq, Reuters allappoq. USA-mimi senati sakkunut inatsimmik sukaterinissamik ukiut 30-t missaat matuma siorna kingullermik akuersivoq.

Sakkunut inatsimmik sukaterinissamik siunnersuummik akuersineq USA-p inatsisartuisa innuttaasut sinnerlugit sinniisoqarfiannut, tassa Repræsentanternes Husimut, inaarutaasumik taasissutigineqartussanngorlugu ingerlateqqinneqarpoq. Tassani demokratit amerlanerussuteqarluarmata, inatsisissatut siunnersuut taanna USA-p præsidentianut naggataatigut atsiugassanngortillugu akuerineqassangatinneqarpoq.

AAMMA ATUARUK USA-mi senatorit sakkoqarsinnaanermut inatsisinik sukaterinissamut isumaqatigiittut

Inatsisissatut siunnersuut taanna ilaatigut inuit pillugit paasissutissanik soorlu angerlarsimaffimmi nakuusersimasutut inuusuttuunermiluunniit arlaannaatigulluunniit pinerluuteqarsimasutut eqqartuussaasimanermut tunngasunik sukumiinerusumik misissuisoqarsinnaanissaanik ilaqarpoq.

USA-milu naalagaaffiit ataasiakkaat inatsisinik soorlu inuit imminut innarlernissamik inoqatiminulluunniit navianartorsiortitsinissamik aarlerinaatilittut nalilerneqarsimasut sakkunik pisisinnaanissaannut inerteqqutinik atuutsitsilersinnaanissaat, USA-p naalagaaffiata aamma taperserpaa.

Demokratit isumaqatigiinniarnermi angorusutatik tamaasa iluatsissimanngitsut, senatimi demokratit qullersaata Chuck Schumerip nassuerutigaa, ilorraalli tungaanut alloriartoqarnera nuannaarutigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl