USA-mi sakkutooq Irak-iliarusunngimmat eqqartuunneqalerpoq

Amerikamiu sakkutuut naalagaat premierløjnant Ehren Watada Irak-imi sorsuffiusumukarusunnginninni pillugu ataasinngorpat eqqartuussivimmut sassartinneqartussanngorpoq, Fort Lewis-imi Washington-imi. Eqqartuussinissaq taamatut ittoq USA-mi aatsaat ingerlanneqartussanngorpoq. Watada siorna juni-mi peqqussummik Irak-imi sakkutuunngoqqusaanini itigartitsissutigisimavaa, oqarluni George W. Bush-ip naalakkersuinermik suliaqarnera akerleralugu. Sakkutuut inatsisaat malillugu præsident-imut asissuisimasutut, sakkutuut naalagaatut pissuserissaarsimannginnera angutaalluartutut pissusilersorsimannginera, siornalu juunip ulluisa 22-anni kangianut qiterlermut sakkutuutut suliartortussaalluni takkutinngitsoornera, eqqartuuneqarnissaanut tunngavilersuutaapput. Ukiut sisamat tikillugit Watada sakkutuut parnaarussivianniittussanngorlugu pineqaatissinneqarsinnaavoq.

- Præsidentip præsidentitut tatiginassutsinni ilaginnarsimavaa, Watada oqarsimavoq. Watada-mik tapersersuisut, naalagaaffiup Washington-ip avannaata kippasinnerusortaani Fort Lewis-imiittut eqqartuussineq aallartippat akerliussutsimik takutitsiniarlutik pilersaaruteqarput. Eqqartuussinissaq USA-imi aalassassimaarutigineqarpoq, amerikamiorpassuit USA-p Irak-imiititaqarnera akerlerimmassuk.