USA-mi republikanerit nuannarineerutilersut

Inatsisartunut qinersinerup immikkoortuani siullermi marlunngorpat qinersisoqarnerani, USA-mi republikanerit ajorsassangatinneqarput.

Bush-ip naalakkersuisuutitaasa Irak pillugu politikkiat tamatumunnga peqqutiginiarneqarpoq. Piviusorli allarluinnaavoq, republikanerimmi inatsisartuni ilaasortaatitaat arlallit kanngunartuliortarnertik pissutigalugu taasisartunit tunukkiartuaarneqarput.

Republikanerini ilaasortat kanngunartuliortarnerat peqqutigalugu, republikanerit ilaasortaat ikinnerpaamik 15-t ullut tallimat qaangiuppata qinersinermi Demokratinut nuunnissaat ilimagineqartoq, aviisi Washington Post allaaserinnippoq.

Qinersisartut affaasa naalakkersuinermik suliaqartut peqquserluttarsorigaat, nutaarsiassaqartitsivimmit CNN-imit paasineqarpoq.

Naalakkersuinermik suliaqartut kanngunartuliortarneri 1990-kkut aallartilaarnerannili paasineqallattaalerput, paasineqartullu amerlanerit republikaneriusarput. Republikanerini ilaasortat sisamat politikkerinik sunniiniartartoq, unioqqutitsillunilu akilerlugit inatsisiliornermi sunniiniartartoq, Jack Abromoff, qanimut suleqatigisarsimagamikku taaneqaqqinnissartik ilimagissagunanngilaat. Inatsisartuni ilaasortaasimasoq, Foley, qanittukkut nukappissanik ukiukitsunik atoqateqartarnini pillugu tunuartoq, ilaasortaaqatigisimasaasa tallimat ilisimannittuugaluarlutik qanoq iliuuseqarsimannginnertik pissutigalugu taaneqaqqinnginnissartik ilimagissagaat eqqoriarneqarpoq.

Republikanerini ilaasortat arlallit makkunannga kanngunartuliortarsimasut paasineqarput; ataatsip panni atorfinitsissimavaa, ataatsip akileraarutinik akiliinnginniassagami Caribiami aningaaserivimmut toqqortuisimavoq, ataatsillu nulii persuttartarpaa, ataatsip nuliaasani toqqusassisimavaa, arlallillu naalakkersuinermik suliaqartuunertik arlalitsigut atornerluttarsimavaat.

- Ataasiakkaat kanngunartuliortarnerat partiip eqqorneqarnerluutigisimagaa, republikanerit oqaaseqartartuat aviisimut Washington Postimut oqarpoq.