USA-mi qinersinissami politikki tunulliunneqalersinnaavoq

Hillary Clinton eqqaassagaanni ilimagineqarpoq arnat qinersisartut Clintonimik tapersersueqqilersimasut. Oqaatiginiarneqaraluarpoq sapaatip akunnerata naanerani Clinton ajorsaqqajaalerami TV-kkut takuneqarsinnaasumik qiasunngorpasissimanera pillugu nalliginnittut qinerserrassimasut. Taamali USA-mi ajornartorsiutit pingaartigisut qinersisartut nalliginninnerinnaq aallaavigalugu qinersisimanissaat ilimananngilaq, Hillary Clintonilli politikkikkut misilittagaqarluartuunini qinerneqarnerussutigisimassagaa ilimanarneruvoq. Sapaatip akunnerani qaangiuttumi Clinton unammillertiminut ajorsaqqajaalermat tapersersuisut uiveqqajaalersimagaluartut eqqissiallakkaluarlutik suli tupassimaqigamik sukanganerusumik, politikki tunulliullugu avaanngunartumik inuttarsiuillutik qineqqusaarnermik ingerlatsilernissaat ilimagineqarpoq. Barack Obama kisiat maanna Clintonip unammilerteriligaa sukannerpaluttumik avaanngunarsinnaasumillu qineqqusaarnermik misilittagaqannginnami qanoq akeriarsinnaassanersoq pissanganarpoq.

Republikanerit akornanni taamatorpiaq aamma pisoqarnissaa ilimagineqarpoq, John McCainimi Mitt Romney-lu naligiingajallutik unammisussanngormata.

Amerikami politikerit præsidentinngorniunnissamut partiiminnut sinniisuuniutut qinersinerit siulliit nangeqqinnginneranni ullut marluk anersaartoqqaalerput.