USA-mi præsidentimut qinersineq Facebookimi 2016-imi eqqartorneqarnerpaasoq
Hillary Clintonip Donald Trumpillu qineqqusaarnerat sakkortuupilussuusimavoq, Trumpillu qinersinermi ajugaanera Facebookimi 2016-imi sammineqarnerpaavoq.
Facebook nutaarsiassaqartitsivik AFP naapertorlugu taama allaaserisaqarpoq.
Brasiliami naalakkersuinikkut ineriartorneq sammineqarnerpaat aapparaat. Dilma Rousseff naalagaaffiup missingersuutaanik kusassaasimasutut unnerluutigineqarluni præsidentitut aggustip qaammataani tunuartinneqarpoq.
Mobilinut app'it 2016-imi eqqartugaarnerpaartaat tassaavoq Pokemón Go, aasaq alutorsaatigineqartupilussuaq.
Taanna Facebookip sammineqarnerpaanut allattorsimaffiani normu 3-uvoq, normu 4-llutik suliniaqatigiit "Black Lives Matter", USA-mi politiit qernertormiunik toqutsisarnerat pillugu 2016-imi akerliussutsimik takutitsinernik arlalinnik aaqqissuisuusoq.
Filippinerini Rodrigo Dutertep præsidentitut qinigaanera sammineqarnerpaat tallimaraat, tulliullutik Riomi OL-eqarnera, brexit aamma Super Bowl.
Facebookip uuttortaanera piffissami januaarip aallaqqaataanit novembarip 27-ata tungaanut ingerlanneqarpoq.
Facebook nittartakkamini allappoq 1,79 milliardinik atuisoqarluni. Atuisut 84,9 procentii USA-p Canadallu avataanni najugaqarput.