USA-mi nakorsat: Qarasaasiami pinnguaatinik pinngitsuuisinnaaneq nappaataava?
USA-mi nakorsat kattuffissuanni sapaatip akunnerata naanerani ataatsimiittoqassaaq. Ataatsimiinnermi nakorsat oqaluuserissavaat tarnikkut nappaammik nutaamik innersuussisoqassanersoq – tassa qarasaasiami pinnguaatinik pinngitsuuisinnaannginneq nappaatitut isigineqalissanersoq oqaluuserissavaat.
Inuusuttuaqqat angajoqqaavisa amerligaluttuinnartut meeqqamik ineeraanni maluginiartagaat tunngavigalugit USA-mi nakorsat kattuffissuata ajornartorsiut oqaluuseritinniarpaa.
Inuusuttuaraq ineeqqaminut toqqorluni qarasaasiami pinnguaatinik tiguartisimaqaluni pinnguartoq, inuunermilu sammisassanik allanik, soorlu kammalaatinik ilaquttanillu soqutigisaarukkiartorneq malunniukkaluttuinnartarpoq.
Ajornerpaamik pisoqartillugu inuusuttuaraq qarasaasiami pinnguaatinik tiguartikkaluttuinnartillugu atuarfimmi malinnaaniarnera ajornakusuuleriartortarpoq. Inuusuttuaqqat qarasaasiami pinnguarsinnaanerminnik mattunneqaraangamik imerajuttutut imigassamik pinngitsuuisinnaajunnaarsimasutut imaluunniit ikiaroornartumik pinngitsuuisinnaajunnaarsimasutut qisuariartartut nakorsanit ilisimaneqarpoq.
Ulluni tulliuttuni nakorsat kattuffissuanni oqaluuserineqassaaq nakorsat tarnikkut nappaatinik suliaqartartut kattuffissuannut, qarasaasiami pinnguaatinik pinngitsuuisinnaannginneq tarnikkut nappaatitut isigineqarnissaanik innersuussisoqassanersoq. Tamannami ataatsimiititaliamit nalunaarusiami ataatsimeersuartunut innersuussutiginiarneqarmat.
Amerikami inuusuttut 90 procentii qarasaasiaq atorlugu pinnguaatinik pinnguartarput, taakkua 15 procentii, inuusuttut 5 millionit missaanniittut qarasaasiaq atorlugu pinnguaatinik pinngitsoorsinnaanngitsut nalunaarusiami oqaatigineqarpoq.
Internetikkut attaveqaqatigiilluni pinnguaqatigiittarneq, soorlu World of Warcraft-imik taaguutillit ajornartorsiutaapput, meeqqallu suli mikinerminni tamakkuninnga pinnguartalersimagaangamik pinnguaatinik tamakkuninnga pinngitsuuisinnaajunnaarnissaat ilimanarnerusartoq nalunaarusiami aamma oqaatigineqarpoq.
Taamatut pinnguarnerup nappaatitut isigineqalernissaanik illersuisut oqaatigaat inuusuttut pinnguaatinik pinngitsuuisinnaajunnaarsimasut nakorsanit katsorsarneqarnissamik pisariaqartitsisartut. Aatsaallu nappaatitut isigineqalerpat napparsimalernissamut sillimmasiisarfiit akiliiumassuseqalertarput.
Suliffissuit qarasaasianik pinnguaatinik sanaartortut oqaatigaat pinnguaatiliatik pinngitsuuisinnaanermik pilersitsineq ajortut nakorsallu kattuffissuat iluamik tunngavissaqarani nalunaarusiorsimanerarlugu.
