Arnat arfinillit 18-it 48-llu akornanni ukiullit Johnson & Johnsonimeersumik akiuussuserneqareernerminnit sapaatit akunneri marluk iluanni nassuiaruminaatsumik taqqakkut milittoorput.Assi: Scanpix

USA-mi Johnson & Johnsonimeersumik akiuussusiisarunnaarallarniartut

Inuit arlallit taqqakkut milittooreersullu, akiuussutissat Danmarkip amerlanerpaanngorlugit inniminnersimasai USA-p atorunnaarallarnissaat inassutigaa.

Inuit arfinillit nassuiaruminaatsumik taqqakkut milittooreersullu, coronavirusimut Johnson & Johnsonimeersumik akiuussusiisarunnaarallarnissaq USA-p nakorsaatinut aqutsisoqarfiata inassutigaa.

USA-p inuussutissanut nakorsaatinullu aqutsisoqarfia, FDA, taama nalunaarpoq.

Atorunnaarallarnissaannik pilersaarneq mianersornissamik tunngaveqartoq, atorfillit kinaassutsiminnik isertuussisut The New York Timesimut oqarput.

Arnat arfinillit 18-it 48-llu akornanni ukiullit Johnson & Johnsonimeersumik akiuussuserneqareernerminnit sapaatit akunneri marluk iluanni nassuiaruminaatsumik taqqakkut milittoorput.

Arnani taakkunannga ataaseq toquvoq, ataaserlu perululluni.

Danmarkimut pingasunngorpat tikissasut

Johnson & Johnsonimeersumik akiuussuserneqarnerat nassuiaruminaatsumillu taqqakkut milittoornerat imminnut attuumassuteqarsut ilisimaneqanngilaq. Akiuussutissalli AstraZenecameersut nassuiaruminaatsumik taqqakkut milittoorutaasinnaasorineqarmata nunat arlallit allatut periuseqarluni akiuussusiissutaanissaat atorunnaarallarnissaalluunniit inassutigaat.

Akiuussutissat Danmarkip amerlanerpaanngorlugit inniminnersimasai katillutik 8,2 millioniusut Johnson & Johnsonimeerput. Siullertut nassiut Danmarkimut pilersaarutit malillugit pingasunngorpat tikissapput.

AAMMA ATUARUK USA-mi inuit coronamut tamakkiisumik akiuussuserneqareersimasut 66 millionit missilioraat

USA-mi coronamut akiuussuserneqareersut 120 millionit missaanniittut amerlanerpaartaat Pfizer/Biontechimeersumik Modernameersumilluunniit akiuussuserneqarput.

Ataasiaannarluni kapisissutaasartoq

USA-mi coronamut akiuussuserneqareersuni 6,8 millionit Johnson & Johnsonimeersumik tassa ataasiaannarluni kapisissutaasartumik akiuussuserneqarput.

USA-mi inuit taqqakkut milittoortortut ukiumut 300.000-t 600.000-llu akornanniittartut, USA-p nappaatinik nakkutilliinermut pitsaaliuinermullu sullissivianit (CDC) kisitsisini erserpoq.

Arnat arfinillit taakku nassuiaruminaatsumik taqqakkut milittoorsimanerat pillugu pingasunngorpat misissuisoqalissasoq, FDA Twitterimi allappoq. Coronamut akiuussutissat Johnson & Johnsonimeersut kingunerluutigisinnaasaannik misissuisoqareernerata tungaanut atorunnaarallarnissaat inassutigigitsik, FDA allappoq.

Akiuussutissat AstraZenecameersut Danmarkimi Norgemilu atorunnaarallarput.

Akiuussutissat Pfizer/Biontechimeersut Modernameersullu taamaallaat Kalaallit Nunaanni kapisissutaasarput. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat