USA-mi inuusuttut qinersinerat sunniuteqartaqaaq
USA-mi qinersisoqartarnerani inuusuttut qanoq qinersinerat aatsaat taama maanna sunniuteqartigisinnaavoq. Qinersisartut allattorsimaffiannut allassimanngitsunik ilanngutsitsiniaasut, Rock The Vote, qinersisartunik tuusintilikkaanik nalunaarsuisitsipput. Suliniaqatigiit ukioq mannaannaq qinersisartunik 3 milliuuninik nalunaarsuisitsisimapput. North Carolinami McCain Obamalu naligiiginnangajapput, tamaanili qinerseqqaartussat 580.000-it nalunaarsimammata qanoq tamanna sunniuteqassanersoq pissanngatigineqarpoq. Isumasiuinerit takutippaat qinerseqqaartussat amerlanerit 18-iniit 29-t tungaannut ukiullit, Obama qinissamaaraat. Kingullermilli præsidentinngorniuttoqarmat aamma inuusuttut qinersinissaat pissanngatigineqaraluarpoq taamanikkulli affarinngisaalluunniit qinersiartorsimapput. Qinersisoqalernerit tamaasa inuusuttut qanoq qinersinissaat pissanngatigineqartaraluarpoq, maannakkulli inuusunnerit akornanni Obama malunnartumik nuanarineqarnerummat pissanganeq pissutissaqarluarpoq. Obamap qineqqusaarneranut ikiortaasut inuusuttortaqarnerupput, isumasiunerillu naapertorlugit inuusuttut akornanni Obama 60 procentinit McCainilu 38 procentinit tapersersorneqarput. McCainip immikkut inuusuttunut sammisunik qineqqusaaruteqannginnini peqqissimissutigileriaannaavaa. Qinerserngaartussammi tamarmik qinersiartussappata tamanna McCainimut sunniuteqapiluttussaassammat.
