USA-mi inuppassuit aamma akerliupput

Wisconsinimi guvernørip republikaneriusup Scott Walkersip, pisortat suliffeqarfiini soraarsitsiortornissamik sipaaniuteqartoqarnissaanillu pilersaarutai pillugit, peqatigiiffinnut ilaasortat 70.000-it missaanniittut akerliussutsimik ippassaq takutitsipput.

- Demokratii tassa taama isikkoqarpoq, naalagaaffimmi aqutsisunut republikanerinut akerliussutsimik takutitsisut nilliapput.

Peqatigiiffimmi ilaasortat Wisconsinimi illoqarfiit pingaarnersaanni, Madisonimi, naalakkersuisut allaffeqarfiisa silataanni marlunngormalli akerliussutsimik takutitsilerput.

Scott Walkersip pilersaarutai tassaanerarpaat pisortat suliffeqarfiini atorfilinnut USA-mi republikanerit pilersaarutipalaavi.

Guvernørit republikaneriusut ikinnerpaamik qulingiluat allat sipaarniuteqarnissamik pilersaaruteqartut ilimagineqarpoq.

- Scott Walker Robin Hoodip marluliaqatigaa inupiluk. Piitsut tilliffigikkit tillitatillu pisuunut tunniullugit, akerliussutsimik takutitsisut ilaat, ilinniarnertuunngorniaq, Laura Steigerwald, nutaarsiassaqartitsivimmut Ritzauimut oqarpoq.

Igitsinimi Tunesiamilu pisortanut naalagaaniartunut akerliussutsimik takutitsinerit Wisconsimi akerliussutsimik takutitsisut isummersorfigaat, suaartartarpullu: "Illoqannginnersamut Tahririmut tikilluaritsi"- tassa Igitsinimiut Kairomi katersuuffiat eqqarsaatigalugu.

69-inik ukiulik Jim Schneider allagartarsuarmik Scott Walkerip assinganik assitalimmik tigumiarpoq, allassimasumik: Hosni Mubarak? - tassa Igitsinimi præsidentiusimasoq eqqarsaatigalugu.

Jim Schneider nutaarsiassaqartitsivimmut Ritzauimut ima oqarpoq:

- Ippassaq akerliussutsimik takutitsisoqarneranut Igitsinimiut uatsinnut assersuutissaalluarput.

Peqatigiiffiit sinniisaat guvernørip Scott Walkerip manna tikillugu isumaqatigiinniaqatigiumasimanngilai, partiimilu sakkortuumik konservativiusumi, Tea Partymit, ilaasortanit tapersersorneqarpoq. Tea Party Walker tapersersorlugu akerliussutsimik takutitsisussanik katersuisimavoq.