USA-mi inuit 200.000-nit amerlanerusut coronavirusimik toqquteqarsimasut
Coronavirus USA-mi tuniluutilermalli malunnaatilimmik maanna pisoqarpoq. USA-mimi inuit 200.000-nit amerlanerusut coronavirusimik toqquteqarsimapput.
Tamannami ilisimatusarfiup Johns Hopkins Universityp nalunaarsugaani marlunngornermi ualikkut takuneqarsinnaavoq.
Allatulluunniit oqaatigalugu: USA-mi innuttaasut amerlassusaannut naleqqiukkaanni innuttaasut 1650-iugaangata ataaseq Covid-19-imik toqquteqarsimavoq.
Danmarkimut sanilliukkaanni Danmarkimi innuttaasut 9100-uugaangata ataaseq coronavirusimik toqquteqarsimavoq.
AAMMA ATUARUK Coronavirusimik nunarsuaq tamakkerlugu tunillanneqarsimasut 28 millionit sinneraat
USA-mi tunillanneqarsimasut nunarsuarmi aamma amerlanerpaapput. Tassami nunarsuaq tamakkerlugu tunillanneqarsimasut 31 millionit akornanni 6,8 millionit USA-mi tunillanneqarsimammata.
USA-p præsidentiata Donald Trumpip ataasinngormat oqaatigaa virusip siaruatsaaliornissaa pillugu sulilluarsimalluni. Nutaarsiassaqartitsivik Reuters taama allappoq.
- Nappaat inunnut sunniuteqangaanngilaq. Tupinnaqaaq.
- Utoqqaat uummalluttut allanillu nappaateqartut eqqugaakkajupput, Trump Reutersimut oqarpoq.
USA-mi coronavirusimik toqquteqarsimasut quliugaangata arfineq-marluk 65-it sinnerlugit ukioqartut, USA-mi nappaatinik nakkutilliinermut pitsaaliuinermullu sullissivik, CDC, ilisimatitsivoq.