Covid-19-imut akiuussutissamik atorneqarluarsinnaasumik USA-mi innuttaasut decembarip aallartinnerani neqerooruteqartoqarsinnaanissaa USA-mi innuttaasut naatsorsuutigisinnaassagunaraat, nappaatit tunillaassuuttut pillugit USA-mi immikkut ilisimasallit qaffasinnersaat Anthony Fauci tuluit TV-qarfiannut BBC-mut oqarpoq.
Innuttaasulli akiuussutissamik tunineqarsinnaanissartik utaqqimaaqqaartariaqarsinnaavaat, tassami akiuussutissamik 2021-mi kingusissukkut aatsaat neqeroorfigineqarsinnaanertik naatsorsuutigisariaqarsinnaavaat.
Taamaattoq Covid-19-imut akiuussutissamik isumannaatsumik atorneqarsinnaalluartumillu qanittukkut ineriartortitsisoqarsinnaanissaa piviusorsiornerusoq, Fauci aamma oqarpoq.
- Akiuussutissaq isumannaatsuunersoq atorluarneqarsinnaanersorlu novembarip naalernerani decembarilluunniit aallartinnerani paasiumaarparput, taanna oqarpoq.
AAMMA ATUARUK Trumpip nappaatit tuniluussinnaasut pillugit USA-mi immikkut ilisimasalik atorsinnaanngitsuuneraraa
Coronavirusimut akiuussutissamik ukioq naatinnagu neqeroortoqarsinnaassasoq præsident Donald Trumpip oqaatigereerpaa, tamannalu ilumoortortaqarsinnaasoq Anthony Faucip oqaatigaa.
Akiuussutissamilli inunnut aalajangersimasunuinnaq aallaqqaammut neqeroortoqarsinnaassaaq. Tassami nakorsat, napparsimmavimmi sulisut allat inuillu peruluttut tulleriiarinerni siulliunneqassammata, Fauci oqarpoq.
Akiuussutissamilli tamanit atorneqarsinnaasumik aappaagu 2021-mi qaammaterpaaluit aatsaat qaangiutereerpata neqeroortoqarsinnaalissaaq.
- Innuttaasut akornanni amerlasuut akiuussutissalerneqarsimanissaannik oqarsinnaaleraanni tamanna aatsaat aappaagu aasaanerani ukialernerani aatsaat taamaaliortoqarsinnaalissagunarpoq, Anthony Fauci oqarpoq.
Isummersuutit