USA-mi ilisimatusarfittaaq issittumi pissutsinik sammisaqassaaq
Issittumi isumannaallisaanissaq pillugu isumasioqatigiinneq USA-p ilaani ilisimatusarfittaami Dartmouth Collegemiittumi ingerlanneqartoq naammasseqqammerpoq.
Allattoq Najaaraq Egede
decembarip 07-at 2008 17:21
Ilisimatusarfittaaq taanna taaguuteqarpoq the Institute on Applied Circumpolar Policymik.
Nunatsinninngaanniit peqataasuupput Inuuteq Holm Olsen, Nunanut allanut pisortaqarfimmi pisortaq aamma Aqqaluk Lynge, Inuit Issittormiut Kattuffiata nunatsinni præsidentia.
Aqqaluk Lynge radioavisimut ilisimatitsivoq, isumasioqatigiinneq assorujussuaq ingerlalluarsimasoq assullu pissarsiffiulluartoq.
- Isumasioqatigiinnerup nunani arlalinni issittumi pissutsinik ilisimasaqartunit peqataaffigineqartup maannakkut pinera siunissami suliniaqqinnissamut pingaaruteqarpoq. Silap pissusaata allanngoriartornera isumannaallisaanerlu qulequtaapput ukiuni aggersuni apeqquterpassuarnik pingaaruteqartunik saqqummiivigineqartartussat eqqartorneqartartussallu.
