USA-mi Hillary Clinton kinguaqqavoq
Hillary Clintonip uia, præsidentiusimasoq Bill Clinton demokratinik qinersisartut nuannariunnaaraluttuinnaraat malunnarmat, qineqqusaarnermiit ilaajunnaarsinneqarpoq.
Bill Clinton kukkulluni isumaqarsimagunarpoq nuliami Iowami ajorsariarluni, kingorna New Hampshiremi ajugaaneranut nammineq pissuulluni. Tamatumalu kingorna taamaammat nuliami qineqqusaarnerani saqqumilaaleraluttuinnaleraluarsimagaluarluni. – South Carolinami taartumik amillit puffatseriarlugit, aamma suna anguniagaanersoq; nuliani imaluunniit marluullutik qineqqusaarnerlutik, nalunarsitillugu. Qinersisartut paatsiveerussaannaleraluarsimavai, Clintonillu politikkikkut apeqqutit qinersisartunit nuannarineqanngitsumik akisaleraluarlugit.
Hillary Clintonilli unammillertaata, Barack Obamap taama qineqqusaallaqqitsiginissaa ilimagineqanngeqqaariarluni maanna assut pikkorilluni illuatungiliuppoq. Clinton qineqqusaaqqaalerami, ikiortinilu novembarimi qinersinissaq siunniullugu iliuusissanik piareersaasimapput, ulluni makkunani qinerseqqaarallarnissat ingerlaneranni annerusumik ajornartorsiutiginissaat ilimaginagit. Obamammi qanoq qineqqusaallaqqitsigaluni, tapersersortinilu ikiortigalugit qanoq nukittutigisinnaallutik maanna takutippaat.
