Coronavirusimik tunillatsissimallutik unitttut aatsaat taama amerlatigisut, USA-mi napparsimmaviit amerlanersaasa maanna nalunaarutigaat.

Aviisi The Washington Post marlunngornerup unnuaani taama allappoq.

USA-mi coronavirusimik tunillatsissimalutik napparsimmavinni uninngasut ataasinngornermi 42.000-usut, The Washington Post allappoq. Naalagaaffiit ilaasa ajornerpaanik pisoqarsinnaaneranut piareersarput, napparsimmaviimmi napparsimasut sorliit unitsinneqarlutik katsorsarneqassanersut toqqaasussanngussagamik.

USA-mi naalagaaffinni Ohiomi, Iowami, Kentuckymi, Minnesotami, New Mexicomi, South Dakotami, West Virginiami Wisconsinimilu napparsimmavinnut ataasinngornermi unitsinneqartut coronavirusi nunarsuaq tamakkerlugu tunillaassuutilermalli ullormut aatsaat taama amerlatigipput.

AAMMA ATUARUK USA-mi inuit coronavirusimik tunillanneqarsimasut amerleriarpiloortut

USA-mi coronavirusimik tunillatsissimallutik naalagaaffinni 22-ni napparsimmavinnut unitsinneqartut septembarip naanerani unitsinneqartunit marloriaammik amerlanerusut, Washington Post allappoq.

- Napparsimmavimmut unitsinneqartut imaaginnalerput, ajornartorsiutillu nalaarpavut. Tamanna ingalanniarneqarsinnaanngilluinnarpasippoq, USA-mi nakorsaanermik ilinniartut kattuffianni Association of American Medical Collegesimi ilisimatusartut qullersaat Ross McKinney oqarpoq.

USA-mi nunaannarmi najugaqarfinni napparsimmaviit peruluttunut inissaalatsimmata taakku eqqugaanerpaassangatinneqarput.