USA-mi arnamik aatsaavissuaq siulittaasunngortitsipput
USA-mi innuttaasut sinnerlugit sinniisoqarfimmi demokratit ukiuni aqqaneq-marlunni ikinnerussuteqartarlutik kiisami ippassaq qinersinermi amerlanerussuteqalerput. Inatsisartuni immaqa aamma amerlanerussuteqalerput, tamaannali aatsaat sapaatip-akunneri arlallit qaangiuppata paasinarsissaaq. Naalagaaffinni marlunni illuatungeriit imminnut qanittuararsuummata kisitseqqissaaqqittoqassaaq.
Innuttaasut sinnerlugit sinniisoqarfimmi demokratit amerlanerussuteqalernerisigut siullerpaamik arnaq siulittaasuulissaaq. Demokratit ilaasortaatitaat, San Fransiscomeersoq, 66-inik ukiulik, Nancy Pelosi, USA-mi pissaaneqarnerpaat pingajuattut maanna inissippoq siuttoralugit præsidenti taassumalu tullersortaa:
Kisitsineq naammassineqarluariartoq demokratit qullersaqarfianni ima nipeqarpoq:
- Amerikami innuttaasut tamarluinnarmik ajugaapput, Nancy Pelosi oqarpoq.
Nancy nammineq aamma ajugaangaatsiarpoq; demokratit anguniagaannik suliniuteqassasoq ilimagineqarpoq, ataatsimiititaliat inuttalersorneqarneri akisussaaffigissavai, kiisalu præsident George Buship inatsisissatut siunnersuutai sukateriffigalugillu allanngortitersinnaavai.
- Isumaqassanngilaq uukapaatissinnaassallunga, Nancy Pelosi præsident Bush pillugu oqarpoq.
Nancy Pelosip patajaatsumik demokratit aqqussinnaallugit maannamut takutitsereerpoq.
Qineqqusaarnermi republikanerit Nancy Pelosi innuttaasut sinnerlugit sinniisoqarfimmi sulilissagaluarpat Amerikami pissutsit navianarsisinnaanerannik qunusaarutitut assersuutigisarpaat ima: amerikamiut Irakimi sakkutuuliinissaat akerleraa, naartuersittarneq akuersaarpaa, avatangiisit pillugit suliniutinik tapersersuivoq, arnaqatiminoortartut anguteqatiminoortartullu katissinnaanissaat akuersaarpaa akissarsiallu appasinnerpaaffissaata
qaffanneqarnissaa suliniutiginiarlugu oqartarluni.
Nancy Pelosi ajugaalluni oqalugiarami ima oqarpoq:
toqqissisimanarnerusumik inuuneqarnissarput sulissutiginngilaa. Taamaattumik sakkutuuliussatta angerlartinneqarnissaat sulissutigerusuppara, Nancy Pelosi naggasiivoq.
