USA-mi akerliussutsimik aamma takutitsipput
Nunasisut latinamerikamiut millioninit amerlanerit USA-mi illoqarfippaaluit aqquserngini akerliussutsimik ippassaq takutitsipput.
Nunasisut nunasinerminnut akuerisaanissaat inatsisinillu unioqqutitsillutik nunasisut annertunerusumik pisinnaatitaaffeqalernissaat akerliussutsimik takutitsisunit ilaatigut piumasarineqarpoq.
USA-p kitaani Californiamiit kangiatungaani New Yorkip tungaanut akerliussutsimik takutitsinersuaqarpoq. Nunasisut Amerikami suliffeqarfinnit pinngitsoorneqarsinnaannginnerat akerliussutsimik takutitsinermi ersersinniarneqartunut ilaavoq.
- Ullumikkut ingerlaaqatigiippugut. Aqagu taasissaagut, akerliussutsimik takutitsisut ilaatigut taama suaartarrapput. Takku ilaat aamma allagartarsualisarput allassimasunik: ”Amerikamiuuvugut”!
Nunasisut pillugit inatsisip nutaap Kongresimit akuerineqarnissaa præsident George W. Buship kajumissaarutigaa, latinamerikamiut nunasisut akuerineqarnissaat inatsimmi ilaatigut piumasaqaataavoq. Nunasisorpassuimmi USA-mi sulisartuupput, suliffiit amerikamiorpassuit pileriginngisaat suliffigisarlugit.
- Nunasisut pillugit politikki sukanneqisoq ukiuni 20-ni atuukkaluarmat iluaqutaasimanngilaq. Anngiortunik sulisunik asuli pilersitsivoq. USA-mi aningaasanik aqutsineq ingerlalluassappat, nunasisut pinngitsoorneqarsinnaanngillat, taamaammat akuerisaasariaqarput, akerliussutsimik takutitsinermi aaqqissueqataasut ilaat BBC-mut taama oqartoq, nutaarsiassaqartitsivik Reuters allappoq.
