USA Libyami aallartitaqarnialerpoq

Amerikamiut atorfilittaasa nalunaarutigaat Libya aallartitaqarnikkut tamakkiisumik USA-p attaveqarfiginialeraa.

Libyami kisermaassilluni naalagaasup Moamar Gaddafip atomip nukinganik qaartartuutiminnik atorunnaarsitsineranik USA-p akilernialerpaa.

USA-p Libya naalagaaffittut pinerliinianik tapersersuisutut Amerikami allaqqanera ullut 45-t ingerlanerini aamma peerniarlugu pilersaaruteqarpoq. Tamanna USA-mi Libyamilu oqartussaasut ukiut arlallit ingerlanerini qanillattornerannik aallaaveqarpoq.

USA-p præsidentiata George W. Buship Libyamik nioqqutinik eqqusseqqusiunnaarneq ukioq kingulleq taamaatitippaa, paasinarsimmat sakkussianik sanaartorunnaarsimasoq.

Timmisartorsuup 1980-ikkut ingerlaneranni Skotlandimi illoqarfik Lockerbie qulaatsillugu qaartartumeerneqarnerata kingorna, pinerliiniat qartartumeerisut USA-mi eqqartuussassanngorlugit Gaddafip tunniummagilli, toqusullu ilagisaannut aningaasanik taarsiissuteqarmalli saammaakkiartuaarneqarsimavoq.