USA: Issittup imartaatigut attaveqaasersuineq akilersinnaanngilaq

Pisortat aningaasaataannik akisussaassuseqartumik atuinissaq pillugu allaffeqarfik, U.S. Government Accountability Office, nalunaarusiamik suliarinnittuuvoq. Nalunaarusiami ilaatigut Issittumi umiarsualivinnik itisuunik, immap assinginik suliaqarneq attaveqaatitigullu pitsanngorsaanerit umiarsuit amerlanerusut issittumi angalanerulernissaannut naammannavianngitsut oqaatigineqarpoq.
 
Nalunaasiamittaaq atuarneqarsinnaavoq, Issittumi ukiup ilaannaatigut assartuisoqarsinnaanera umiarsuaatilinnut ajornartorsiutaassasoq, umiarsuaatillimmi ukioq kaajallallugu aalaakkaasumik assartuisinnaanissaq pisariaqartimmassuk.
 
Umiarsuit takornariartaatit angalatinnissaat umiarsuaatilinnit aamma soqutigineqarpallaanngilaq, angalanerit isorartuujummata pisariuallaarlutillu, aammattaaq Issittumi umiarsualiviit ikitsuinnaammata allanngorartumik misigassaqarfiunnginnera tamatumani pissutaasoq nalunaarusiami allaaserineqarpoq.

Amerikamili politikerit arlallit nalunaarusiarmi inerniliussat akuerinngilaat.
 
Assersuutigalugu senatorip Lisa Murkowskip Alaskameersup.
 
Taannami isumaqarpoq sermip aakkiartornerata sukkatsikkiartornera ilutigalugu Issittumi attaveqaatinik inerisaanissamut maanna piffissanngortoq.