Pompeop ataasinngormat nalunaaruteqarnera akerliussutsinik takutitseqqittoqarneranik eqqissiviilliortoqaqqinneranillu kinguneqarataannaavoq. Pompeo tusagassiortunik katersuutsitsiareertoq USA-p Israelimi aallartitaqarfiata Jerusalemimut, Vestbreddenimut Gazamullu angaloqarnissaa minersoqqussutigaa.Assi: Mussa Issa Qawasma/Reuters/Ritzau Scanpix

USA israelimiut Vestbreddenimi nunassarsisimanerannut akuersaartoq

USA-p nunassarsisimanernut assortuussutaasunut akuersinera israelimiut nunnaarutigaat, palæstinamiulli akerliupput.

USA-p israelimiut nunassarsisimanerat pillugu isummani allanngortissimavaa. Israelimiut Vestbreddenimi nunassarsisimanerat nunat tamalaat akornanni inatsisitigut pissutsinik naapertuinnginnertut isigiumajunnaarpaat. 

USA-p nunanut allanut tunngasunut ministeriat, Mike Pompeo, tugassiortunik ataasinngormat katersuutsitsinermi taama oqarpoq.

AAMMA ATUARUK Palæstinamiut sakkutuutut pissusilersortut siuttuat israelimiut sakkutuuinit toqutaasoq

Tamanna USA-p Kangia Qiterleq pillugu politikkiminik allannguerujussuarneranut takussutissaalluinnarpoq. Amerikap nunanut allanut tunngasunut ministeriaqarfiata israelimiut Vestbreddenimi nunassarsisimanerat nunat tamalaat akornanni inatsisitigut pissutsinik naapertuinerunngissorinninnini ukiuni 40-ni kingullerni aalajangiusimavaa.

Israelimiut Vestbreddenimi nunassarsisimanerat nunat tamalaat akornanni pissutsinik naapertuinnginnerusoq, tamannalu israelimiut palæstinamiullu eqqisseqatigiinnissaannut akorngutaalluinnartuusoq, nunarsuup sinnerani nunarpaaluit isumaqarput.

Israelimiut Vestbreddenimi nunassarsiffigisimasaanni illoqarfik Hebron. Assi: Mussa Issa Qawasma/Reuters/Ritzau Scanpix

 

USA-p aalajangernera "eqqaamaneqartuarumaartussamik eqqunngitsuliornerup aaqqiivigineqarneratut" taaneqarsinnaasoq Israelimiut ministeriunerata, Benjamin Netanyahup, oqaatigaa. Nunallu allat USA-tullli iliuuseqarnissaannut kajumissaarlugit.

Palæstinamiulli naalakkersuisuisa oqaaseqartartuat Mahmoud Abbasip oqaatigaa, USA-p isummaminik allannguinera "nunat tamalaat akornanni inatsisitigut pissutsinik naapertuinerunngilluinnartuusoq".

Trump USA-p Israelimut Palæstinamullu tunngatillugu isumaanik allannguisoq

USA Donald Trumpimik siuttoqarallartilluni isummaminik allanguerujussuarpoq, tamannalu Israelip iluaqutigaa.

Tamatuma kingunerisaanik Trumpip USA-p aallartitaqarfiata Tel Avivimit Jerusalemimut nuunneqarnissaa aalajangermagu Jerusalemilu Israelip illoqarfiisa pingaarnerpaattut akuerimmagu palæstinamiut akerliorujussuarput.

AAMMA ATUARUK Savalimmiormiut Israelimi aallartitaqarfeqalernissaat akerleriiffiusoq inissinneqarpoq

Savalimmiormiut Israelimi aallartitaqarfeqalernissartik ulapputigileruttoraat savalimmiormiut nunanut allanut tunngasunut ministeriata sapaatip-akunnerani kingullermi nalunaarutigaa.

Nalunaaruteqaqqaanerminni ilisimatitsissutigaat Jerusalemimi aallartitaqarfeqalissallutik, tamannali naalagaaffeqatigiinnerup nunanut allanut tunngasunut pisortatigoortumik politikkianik unioqqutitsineruvoq. Tamatumali kingorna ulloq unnuarlu qaangiutereersut savalimmiormiut lagmandiat aalajangerpoq, aallartitaqarfittaassartik Danmarkip aallartitaqarfiatulli Tel Avivimi inissisimassasoq.

Israelimiut Jerusalem Israelimi illoqarfiit pingaarnersaattut isigaat, nunalli tamalaat Jerusalem Israelimi illoqarfiit pingaarnersaattut isiginngilaat. Palæstinamiut Jerusalemip kangississua siunissami illoqarfiit pingaarnersaanngortikkusuppaat.

Israelimiut Vestbreddenimi nunassarsisimanerat nunat tamalaat akornanni pissutsinik naapertuinnginnerusoq, tamannalu israelimiut palæstinamiullu eqqisseqatigiinnissaannut akorngutaalluinnartuusoq, nunarsuup sinnerani nunarpaaluit isumaqarput. Assi: Mohamad Torokman/Reuters/Ritzau Scanpix

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat