USA Islandilu ataatsimeeqatigiilerput
Islandip illersorneqarnera qanoq pissava? Apeqqut taannarpiaq USA-p Islandillu aallartitaasa ullumi oqaluuserissagaat, Islandimi aviisi Morgunbladid allappoq.
Island NATO-mi Nunat Killiit Illersoqatigiiffianni ilaasortaasoq Amerikamiut 1950-ikkunnili sakkutooqarfigaat. Kisianni USA-p præsidentiata George Buship marsip qaammataani aalajangerpaa Keflavikimi sakkutooqarfitsik septembarimi matussasoq.
Islandimiut aalajangerneq naammaginngilaat, oqarlutik illersornissamut isumaqatigiissut USA-p taamaaliornermigut unioqqutikkaa. Isumaqatigiissut taamaatinneqassappat qaammatit 18-it sioqqullugit nalunaartoqartussaavoq, USA-lli nalunaarnera qaammatinik arfiniliinnarnik sioqqutsitsineruvoq.
Islandimit amerikamiut aallarpata qulimiguullit atorlugit annaassiniartarnerit unissapput, soorluttaaq sakkutuut ilaqutaasalu atorfii tusindit atorunnaassasut, Islandimiullu hundredit arlaqartut suliffissaarutissallutik.