USA inupilussuujunnaalerpoq
USA nunarsuarmi avatangiisinik mingutsitsineq eqqarsaatigalugu inupiluttut isigineqaqqajaasarpoq, pingaartumik mingutsitsinnginnissamik nunat tamat atsioqatigiissutaat Kyoto-mik taagukkamut amerikamiut atsioqataarusunnginnerat eqqarsaatigalugu.
Bush-ili naalakkersuisoqataalu amerikamiut sinnerlugit isummersortuunngillat. Amerikamioqarpoq avatangiisiminnik mianerinnittunik, folketingimi ilaasortaq Kuupik Kleist oqarpoq.
- Ernunnatimma ilai sakkukilliallattutut oqaatigisariaqarput, tassa suliniuteqartut naalakkersuisut avataatigut amerlammata aamma inuinnaat akornanni arlaatigut avatangiisit illersorniarlugit suliniartariaqarneq isumagineqarmat.
Kuupik Kleist folketingimi avatangiisinut pilersaarusiornermullu ataatsimiititaliami ilaasortaqatini peqatigalugit USA-mi angalaaqqammerpoq, California Washingtonilu ulluni qulingiluani paasisassarsiorfigalugit. Politikerit, atorfilittat aamma ilisimatuut silap pissusianik avatangiisillu ilisimatusarfigineqarneranik eqqartueqatigineqarput.
-Tassa pulaakkagut arlaliupput, ilaatigut A.P. Møllerip umiarsualiveqarfissua USA-mi imamqalu nunarsuarmi annerpaat ilaat. Taassuma saniatigut Microsoftip qullersaqarfia alakkarparput, pulaarparput aammalu ataatsimeeqatigalugit. Aammalu Boeingip timmisartuliorfissua aamma pulaarlutigu. Taakkunani suliffeqarfissuarni nunarsuaq tamakkerlugu ingerlatsiffiusuni aammalu mingutsitsiffioqisuni pingaaruteqarami tamakkua aamma soorlu tunisassiornerminni periusaat avatangiisinut illersuiniarnerusumik ingerlattariaqarmata neriuutigigatsigu nunarsuaq tamakkerlugu mingutsitsinerup annikilleriarnissaa aamma taakkunani isumaqarpunga paasisagut qiimmaallannartut.
Kuupik Kleist isumaqarpoq avatangiisit eqqarsaatigalugit USA inupilussuartut isigisariaaruttoq, allaallu Kyoto-mi isumaqatigiissummut atsioqataanissaat ungasigunnaartoq. Apeqqutaaginnassaaq Buship qaquguugaluarnersoq kingoraartigiligassaa.
- Isumaqarpunga neriunaateqartoq aamma uagutsinnut annertuumik silaannaap allanngoriartorneranik mingutsitsinermillu sunnerneqarsimasunut. Neriunaateqarpoq ukiuni tulliuttuni arrortinneqarsinnaanngitsunik aniatitsinersuaq aammalu silaannaap allanngoriartorneratnut ilapittuutaasunik aniatitsinersuaq annikilliartortinneqalissasoq.
Kuupik Kleist, IA-meersoq taama oqarpoq. Nunanut Danmarkip avataaniittunut angalasarneq folketingip ataatsimiititaliaasa ileqqoraat. Unalu USA-mut angalaneq akileraartartut 270.000 koruunilerpaat.
