USA immami itisuumi uuliasioqqilerpoq
Nutaarsiassaqartitsivimmi Ritzauimi tamanna allaaserineqarpoq.
Uuliasiortitseqatigiiffiup BP-p Mexicop Kangerliumanersuani uuliamik maqisoorluni mingutsitsinerujussuanut assingusumik pisoqannginnissaanut inatsisit nutaat iluaqutaasimasut, USA-mi naalakkersuisut ilisimatitsissutigaat.
Immani itisuuni qillerisarnerit arriitsuinnarmik aallartisarneqassagunarput, ikuallattoqalissagaluarpammi tamatumunnga annertuumik upalungaarsimanissamut malittarisassat inatsisillu nutaat uuliasiortitseqatigiit ilaatigut allanngortittussaammatigik.
USA-mi nalinginnaasumik qinersinerit akornanni novembarimi qinersinissamut piffissaq qanillisorlu immani itisuuni qillerisinnaanermut inerteqqut assortuussutaaqisoq atorunnaarsinneqarpoq. Aningaasarsiornikkut ajornartorsiorneq suliffissaaleqinerlu pissutigalugit nalinginnaasumik qinersinerit akornanni qinersinermi Barack Obamap tapersersorneqarnera annertuumik appariassagunarpoq.
Mexicop Kangerliumanersuani uuliamik maqisoorujussuarnerup kingorna immani itisuuni qillerisarnerit ingerlanneqartarnerisa nutarterneqarnissaat naalagaaffimmi atorfillit ilungersorlutik sulissutigisimavaat.
