USA Kinaminngarnit coronaviruseqarfiunerulersoq

Coronavirusimik tunillanneqarsimasutut USA-mi nalunaarsukkat amerlassutsimikkut Kina maanna qaangerpaat. USA-mimi coronavirusumik tunillanneqarsimasut ippassaq unnukkut 82.404-nngorput.

Johns Hopkins Universityp kisitsisaataasa tamanna takutippaa.

Kinami tunillanneqarsimasutut nalunaarsukkat maannamut 81.782-iupput, USA-milu maanna tassa amerlanerulerlutik.

New York eqqugaaqisoq

Nualluummik USA-mi toqquteqartut maanna 1178-iupput, Kinamilu pingasoriaatingajammik amerlanerullutik 3291-iullutik.

Italiami nualluummik toqquteqartut nunarsuarmi amerlanerpaapput tassani 8215-it coronavirusimik toqquteqarsimammata.

Illoqarfissuaq New York nualluummit eqqorneqarnerpaavoq. Aviisip The New York Timesip allaaserisaa naapertorlugu USA-mi tunillanneqarsimasut affaat sinnerlugit naalagaaffimmi New Yorkimi siumorneqarsimapput.

Inuit 100-t nalunaaquttap akunneri 24-it ingerlaneranni toqquteqartut

Nualluummillu New Yorkimi toqquteqartut amerliartupiloortuarsinnarput. Inuit 100-t nalunaaquttap akunneri 24-t ingerlaneranni nualluummik toqquteqarsimasut, New Yorkip guvernøriata Andrew Cuomop nalunaarutigaa. Nutaarsiassaqartitsivik AFP taama allaaserisaqarpoq.

Tamaani napparsimmaviit artukkerneqarput, napparsimasummi unitsinneqartut amerliartupiloorput, amerlasuullu sapaatit akunnerini tulliuttuni unitsinneqarnissaat ilimagineqarpoq.

New Yorkimi innuttaasut 11 millionit missaanniipput, coronavirusillu tuniluunnera pakkersimaarniarlugu iliuutsit sukannersut eqqunneqarput. Aqqusernit inoqarpallaanngillat, pisiniarfippassuillu matoqqallutik.