USA EU-lu aningaasaqarnermik ilorraap tungaanut saatitsinialerput
USA-p præsidentia George W. Bush EU-p qullersaanik nunarsuarmi aningaasaqarnikkut ajornartorsiorneq pillugu ataatsimeeqateqaqqammerpoq. Nunarsuarmi nunat aningaasarsiornermi siuttut aningaasaqarnerup ingerlalluaqqilernissaanik qulakkeerinninnissaq eqqartoqatigiissutigisariaqaraat, Amerikap præsidentiata aasarsiortarfianit Camp Davidimit sapaammi unnukkut nalunaarutigineqarpoq.
Allattoq Najaaraq Egede
oktobarip 19-at 2008 13:42
George W. Buship, Frankrigip præsidentiata Nicolas Sarkozyp aamma EU-kommissionip siulittaasuata José Manuel Barrosop isumaqatigiillutik nunarsuarmi aningaasaqarnerup ilorraap tungaanut sangutinniarnissaa peqatigiillutik anguniarumavaat.
Nunarsuarmili siuttut ataatsimiinnerat siulleq amerikami præsidentimut novembarip ulluisa sisamaanni qinersisoqareerpat aatsaat pissaaq.
- Aningaasaqarnikkut maanna ajornartorsiorneq siunissami pinngitsoortinniarlugu aaqqissuusseqqinnissaq ataatsimiinnerni arlalinni oqaluuserissagaat, siuttut nalunaarput. Qaqugorpiarli ataatsimiinnerit pissanersut erseqqissaatigineqanngilaq, ilimagineqarlunili novembarip naalernerani pissasut.
