USA ersarissumik suli akissuteqanngittuarsinnarpoq
Tuluit Nunaata apeqqutai CIA-p isertortumik tigusanik angallassisarneranut tunngasut, Danmarkip akissutisineraniit ersarinnerusumik akineqareerput. Tamanna danskit nunanut allanut ministeriata Per Stig Møllerip nassuerutigereerpaa.
USA-p Tuluit Nunaat sakkutooqarfittut atorsimannginnerartariarlugu nassueratarput marloriarlutik atorsimaneralugu.
- Aappaagu Barack Obama præsidentinngorsimaleriarpat, Danmark kingumut Amerikamiunut apereqqissinnaassaaq, taamaalillunilu paasinarsissaaq præsidentinngortup amerikap nunanut allanut politikkianut qanoq ammanerutigissanersoq Frank Aaen Enhedslisten-imeersoq oqarpoq.
Danskit naalakkersuisuisa nassuiaasiaanni ersippoq, CIA-p isertortumik, Danmarkip, Kalaallit Nunaata Savalimmiullu silaannartaata nalaatigut timmisartuussisarsimaneranut tunngatillugu apeqqut, manna tikillugu USA-p erseqqissumik akissuteqarfigisimanngikkaa.