USA atsioqataanissamut piareersimanngilaq

Silap pissusaata allanngoriartornera pillugu Københavnimi aappaagu ataatsimeersuartoqalerpat, silap pissusaa pillugu isumaqatigiissummik atsioqataanissamut USA piareersimanngilaq.
septembarip 17-at 2008 07:39

Taama naliliivoq nunanut allanut politikki pillugu immikkoortortaqarfimmi, Germann Marshall Fundimi, pisortaq, John K.Glenn.

Barack Obama imaluunniit John McCain novembarip qaammataani præsidentimut qinigaagunik silap pissusaa pillugu isumaqatigiissummut atsioqataanissaannut piffissaq sivikippallaassaaq, John K.Glenn oqarpoq.

Præsidentimut qinigaasup allaffeqarfigiligassani qinersinerup kingorna suliarissavaa, taamatullu Amerikami senatimit akuerineqartussaalluni.

John K. Glennip erseqqissarpaa, præsidentimut qinigassanngortittut marluullutik silap pissusaa pillugu ataatsimeersuarnissamut tapersersuerpalaartuusut, ataatsimeersuarnissamullu peqataanissaminnut kissaateqarsimasut.

Washingtonimili isuma allaavoq, silap pissusaa pillugu isumaqatigissummut USA-p aappaagu 2009-mi atsioqataanissaanut siusippallaartoq isumaqaramik.