USA: Ataatsimiinneq oqaluttuarisaanermut pingaaruteqassaaq

Issittumi uuliamik maqisoortoqassagaluarpat, ataatsimoorussamik sillimaniarnermut piareersimasoqarnissaa pillugu pisussaaffiliisumik isumaqatigiissuteqartoqarnissaa, USA-p nunanut allanut ministeriata Hillary Clintonip qulakkeerusuppaa. Sapaatip akunnerani matumani ministerit Nuummi ataatsimeeqatigiinnissaat sioqqullugu USA-mi nunanut allanut ministeeriaqarfimmit paatsuugassaanngitsumik taama nalunaartoqarpoq.
Allattoq Elisa Isaksen
maajip 10-at 2011 09:52

- Ataatsimiinnissaq oqaluttuarisaanermut pingaaruteqalersinnaavoq. Ukiuni tulliuttuni  marlunni Hillary Clinton aamma nunanut allanut ministerit, Issittumi uuliamik maqisoortoqassagaluarpat iliuusissanik qulakkeerinninniarlutik isumaqatigiinniarnerit aallartissavaat, USA-mi nunanut allanut ministeeriaqarfiup oqaaseqartitaa Julie Reside nittartakkamut Bloomberg.com-imut oqarpoq.

Nunat Issittumi Siunnersuisoqatigiinnut ilaasortaasut arfineq pingasuusut sisamanngorpat ataatsimeeqatigiilerunik, Issittup imartaani ajornartorsiortunik ujaasisarnermut annaassiniartarnermullu piareersimasoqalernissaanik ataatsimoorussamik isumaqatigiissuteqartoqarnissaa naatsorsuutigineqarpoq, maannali Washingtonimit nalunaarutigineqartumi siunissami issittumi uuliasiornikkut ajunaarnersuaqassagaluarpat, ataatsimoortumik sillimaniarnissaq pineqarpoq.

Tamatumunnga atatillugu Naalakkersuisut siulittaasuata Kuupik Kleistip ukiormanna siusinnerusukkut, Issittumi uuliamik maqisoortoqassagaluarpat saliinissamut atugassanik aningaasaateqarfiliornissaq kissaatigalugu oqaatigereerpaa. Tamanna Inuit Issittormiut Siunnersuisoqatigiiffiannit immikkullu ilisimasalinnit arlalinnit tapersersorneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq