Søren Espersen (DF) aamma Martin Lidegaard (R) Kalaallit Nunaata Danmarki avissaarfigeriarlugu USA-mut qanillattorniarneranut aarlerisaaripput.qanillAssi: Anders Hviid

Danmarkimi politikerit: USA aqqutigalugu namminersulivinniarsarineq uppianeruvoq

USA Kalaallit Nunaata aningaasaqarniarneranik nakkutilliisunngorpat Kalaallit Nunaat siunissami tamaviaartorujussuanngussaaq. Danmarkimi politikerit arlallit Pele Brobergip USA peqatigalugu isumaqatiginninniartoqarnissaanut siunnersuutaanik avoqqaarisut taama isumaqarput.

- Oqariartaaseq una; kissaatitit takorluukkatillu mianersuuttakkit ussatitoqaavoq. Kissaatigisammi takorluukkallu piviusunngoratarsinnaasarput, Dansk Folkepartip siulittaasuata tullia Kalaallit Nunaannullu tunngasunik oqaaseqartartua Søren Espersen oqarpoq.

Esperseni Pele Brobergip Partii Naleqqameersup USA-p Kalaallit Nunaata namminersulivinnissaanut qanoq ikiuutsigisinnaaneranik misissuititsiniarneranut tunngatillugu tallimanngormat Tweetikkut tusangiasaarilluinnarluni kissaassinerminut uiggiutigalugu taama oqarpoq.

Pele Brobergip USA-p nunatsinnut aningaasanik tapiissuteqartalernissaanut siunnersuutaa Søren Espersenimit (DF) Twitterikkut tallimanngormat qisuariarfigineqarpoq.​​​​ 


Siunnersuutaa uppianerulluinnarpoq, Søren Espersen itisiliivoq:

- USA aqqutigalugu kiffaanngissuseqalernissamik tamatumalu ilutigisaanik naalagaaffeqatigiinnermi suleqatigiilluartoqarnissaanik eqqarsartoqarsinnaanera isumaalunnarluinnarpoq. Namminersulivinneq Kalaallit Nunaannut eqqunneqaraluarpat Kalaallit Nunaanni naalakkersuinikkut ingerlatsineq USA-mit qularnanngitsumik tiguarneqalertupallassaaq.

USA-p killeqarfiini imarpiit ungataanniittuni soorlu Puerto Ricomi aamma Jomfruøernimi (siornatigut Indiaaqqat, aaqq.) pissutsit Alaskallu inoqqaavisa atugaat ilaatigut eqqaavai.

AAMMA ATUARUK Oqallinneq: USA-p aningaasaqarnerput qulakkiissavaa?

- Naalagaaffeqatigiinneq tunngavigalugu isumatusaartumik ineriartortitsisoqarsinnaanera eqqarsaatigalugu Kalaallit Nunaat assorsuaq maligassatut isigaat. Amerikap inoqqaavi naalagaaffeqatigiinnermik misilittagaqanngillat. Nunarput Danmarkimiit avissaarpat Kalaallit Nunaannut annertuumik sunniuteqassaaq, Søren Espersen oqarpoq.

Isumaqarporli Kalaallit Nunaata Danmarkimik Savalimmiunillu suleqateqarnera nunatta siunissaanut pitsaanerpaassasoq, aamma aningaasaqarnikkut.

- USA-p Kalaallit Nunaannut ukiut tamaasa 4,5 milliarder koruuninik ataatsimoorussamik taapiissuteqartalerumaarnissaa qularnarpoq. Aamma sooq taamaaliorusussagami?

Lidegaard: USA taggississaaq

Taamatuttaaq nunanut allanut tunngasunut politikkikkut aalajangiisartoqatigiit siulittaasuat nunanullu allanut ministeriusimasoq Martin Lidegaard (R) Kalaallit Nunaata Danmarkimit aningaasaqarnikkut ikorfartorneqarunnaarluni USA-mit ikorfartorneqartalernissaanik oqalunnermut tunngatillugu USA-mik oqaloqateqarnissamut aarlerisaarivoq.

- Isumaqarpunga USA naalagaaffittut akeqanngitsumik tunissuteqartanngitsuunerata erseqqissaatiginissaa pingaaruteqartoq. Kalaallit Nunaat aningaasanik USA-mit pissarsisalerusussagaluarpat paarlattuanik tigussaalluinnartunik tunissuteqartariaqartalissasoq aamma qularinngilluinnarpara.

Lidegaardip tunissutit USA-mit piumasarineqartarlerumaartussat sorpiaanissaannut eqqoriaanissani merseraa.

AAMMA ATUARUK Partii Naleqqap USA-mut qanillattornera pillugu Siumut: Tulluanngilaq

Isumaqarporli Kalaallit Nunaata Danmarkillu naalagaaffeqatigiinnermikkut ukiuni kingullerni angusaqarluarnerusalersimasut, ingammik Danmarkip naalagaaffiata Kalaallit Nunaata mittarfeqarneranut inuussutissarsiornermullu agguaassassaanut aningaasaliissuteqartarsimanera eqqarsaatigalugu.

Martin Lidegaard aamma isumaqarpoq Kalaallit Nunaat USA-mut qanillattorniaannarani Danmarkimik qanimut suleqateqarnera annertunerulertariaqartoq. 

Taamaattorli USA-p Kalaallit Nunaannik soqutininninnera ajuusaarutiginngilaa. Trumpimmi Kalaallit Nunaannik pisiarinnikkumalluni qanittukkut oqarnera naalagaaffeqatigiinnermut annertoqqutaaqataavoq.

- Aappaatigut isumaqarpunga taama oqarnera - Danmarkimi aammalumi Kalaallit Nunaanni - sivisuumik pisariaqartissimasatsitut eqiiallassutaasoq, KNR-imut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat